इस्ट रदरफोर्ड — इक्वडेरका प्रशिक्षक सेबास्टियन बेक्कासिसको सुनौला रंगको कपाल लामै छ । त्यसैलाई फरफराउँदै इक्वडेरको ऐतिहासिक जितपछि उनले दर्शकदीर्घातिर फर्केर आफ्नी पत्नी र परिवारसँग खुसी साटे । उनको नजिकका केही इक्वडेर समर्थकले पिठ्युँमा थपथपाए । त्यही बेला दसौं हजारका इक्वडेर समर्थक खुसीमा झुमिरहेका थिए ।

गोन्जालो प्लाटाले शुक्रबारको खेलमा शक्तिशाली टोली जर्मनीविरुद्ध गोल गरेपछि इक्वडेर र यसका प्रशिक्षकले अत्यधिक राहत महसुस गरेको थियो । अन्ततः त्यही निर्णायक गोल साबित भयो । प्रतियोगिता सुरु हुन अगाडि सबैभन्दा कमजोर टिममा इक्वेडरको पनि नाम थियो । धेरैको अनुमान के थियो भने यसपल्टको विश्वकपमा इक्वडेरको प्रदर्शन बिर्सनलायक रहनेछ । 

अब जतिबेला इक्वडेर विश्वकपको नकआउट चरणमा प्रवेश गरिसकेको छ । तिनै प्रशिक्षक बेक्कासिस मान्छन्, अहिलेको समय टिमको समर्थनमा सबैले खुसीयाली मनाउने बेला हो । उनी भन्छन्, ‘कहिलेकाहीं हारमा असाध्यै पीडा हुन्छ अनि कहिलेकाहीं जितमा असाध्यै धेरै खुसी मिल्छ । आजको जित यस्तै रह्यो, असाध्यै धेरै खुसी मिलेको छ । त्यसैले सक्दो बढी रमाऔं ।’

जर्मनीको सामना गर्नु अगाडि इक्वडेरको स्थिति राम्रो थिएन । इक्वेडरसामु प्रतियोगिताबाट बाहिरिएर घर जाने डर थियो । हारको स्थितिमा टिम निश्चित रूपमा नै बाहिरिने अवस्था थियो । यस्तै डरबीच जर्मनीले लेरोय सानेको गोलबाट दोस्रो मिनेटमै अग्रता लियो । तर यो लामो समय टिकेन, नवौं मिनेटमा इक्वेडरका निल्सन एङ्गुलोले बराबरी गोल फर्काए । 

प्लाटाको गोल भने ७७ औं मिनेटमा सम्भव भएको थियो । अब त इक्वडेर यस विश्वकपमा आफ्नो सम्भावनालाई लिएर अझ धेरै आत्मविश्वासी बनेको छ । बेक्कासिसको नजर त अब क्वाटरफाइनलतर्फ छ । उनी भन्छन्, ‘अहिलेसम्म इक्वडेरले विश्वकपको क्वाटरफाइनल खेलेको छैन । अब सक्छौं कि सक्दैनौं ? तर हामीले यसका लागि कडा मिहिनेत गर्नेछौं । मलाई पूरा विश्वास छ, यो सम्भव छ र यो टिम यसका लागि हकदार पनि छ ।’

चारपल्टको विश्वकप च्याम्पियन जर्मनीलाई हराउने इक्वेडर दक्षिण अमेरिकाको तेस्रो देश पनि भएको छ । विश्वकपमा जर्मनीलाई हराउने दुई टिम भनेकै ब्राजिल र अर्जेन्टिना थिए । त्यो पनि फाइनलजस्तो ठूलो अवसरमा । त्यसैले इक्वेडरको अहिलेको जर्मनीमाथिको जितको धेरै अर्थमा ऐतिहासिक रहनेछ ।

विश्वकप २०२६