अल्जेरियासामु विश्वकपमा अस्ट्रियासँग ४४ वर्ष पुरानो खेलको बदला लिन अवसर हुनेछ, जतिबेला यी दुई देश लिग चरणको आफ्नो समूहको अन्तिम खेलमा भिड्नेछन् ।
काठमाडौँ — अल्जेरियासामु विश्वकपमा अस्ट्रियासँग ४४ वर्ष पुरानो खेलको बदला लिन अवसर हुनेछ, जतिबेला यी दुई देश लिग चरणको आफ्नो समूहको अन्तिम खेलमा भिड्नेछन् । यो चरणको खेलमा एउटा डर रहनेछ, कतै टिमले आफूअनुकूल नतिजा निकाल्न खास नतिजाका लागि खेल्ने त होइन ? सन् १९८२ को विश्वकपमा पश्चिम जर्मनीले अस्ट्रियालाई १–० ले हराएको थियो । यो यस्तो नतिजा थियो, जसका कारण गोल अन्तरको आधारमा अल्जेरिया प्रतियोगिताबाट बाहिरिएको थियो ।
ती दुई देश भने अगाडि बढे । यो खेललाई अझै पनि ‘गिजोनको अपमान’ नामले सम्झिने गरिन्छ । यो खेलको नतिजालाई लिएर व्यापक विरोध पनि भएको थियो । यस्तोमा फिफाले एउटा ऐतिहासिक निर्णय गरेको थियो, लिग चरणको अन्तिम दुई खेल एकै समय गराउने ।
यसपल्टको विश्वकपमा ४८ टिमको सहभागिता रहेको हुनाले आफूअनुकूल नतिजा निकाल्न सक्ने डर फेरि तयार भएको छ । सन् १९९४ यता पहिलो पटक तेस्रो स्थानमा आउने टिमले पनि नकआउट चरण खेल्नेछन् ।
नकआउट चरण पुग्न अहिले पनि ४ अंक पर्याप्त हुनसक्छ । अहिलेको विश्वकपमा ४८ टिम छन् । ती टिम १२ समूहमा छन् । त्यही १२ समूहको तेस्रो स्थानमा आउने टिममध्ये शीर्ष आठले अन्तिम ३२ को चरण खेल्नेछन् । समूह ‘डी‘ मा बिहीबार अस्ट्रेलिया र पाराग्वे भिड्दै छन् । दुवैको समान ३ अंकमा छ । यी दुवै टिमले टर्कीलाई हराएको थियो अनि सह–आयोजक अमेरिकासँग भने पराजित भएको थियो । यो खेलको नतिजा बराबरीमा टुंगिने हो भने दुवै टोली नकआउट चरण पुग्नेछन् ।
अस्ट्रेलियाली डिफेन्डर जेसन जेरिया यही खेललाई लिएर भन्छन्, ‘केहीलाई यो खेलमा बदमासी हुनसक्ने डर छ । तर यस्तै हुनुपर्छ भन्ने हुन्न । हामी दुवै थप एक अंक जित्ने हो भने अर्को चरण पुग्नेछौं । हामी यही नतिजा मनमा राखेर खेल्ने छैनौं ।’
शुक्रबार इजिप्ट र इरानबीच खेलको स्थिति पनि यस्तै छ । दुवै टिमका लागि एक अंक अर्को चरण पुग्न पर्याप्त छ । त्यसैले यो खेलका नतिजा बराबरीमै टुंगिने सम्भावना धेरै छ । भू–राजनीतिको तनावबीच विश्वकप खेलिरहेको इरान सुरुआती दुवै खेलमा अपराजित छ ।
यी दुई बराबरीका लागि इरानले सक्दो राम्रो खेलेको छ । लगातार तेस्रो बराबरीले पनि इरानलाई नकआउट चरण पुर्याउने छ । यस्तो भएमा विश्वकप इतिहासमै पहिलो पटक इरान नकआउट चरण पुग्नेछ, उत्कृष्ट एक तेस्रो टिमका रूपमा ।
समूह ‘जी’ बाट इजिप्ट पनि अर्को चरण पुग्न सक्छ । यदि यही समूहको अर्को खेलमा बेल्जियमले न्युजिल्यान्डलाई दुई गोलभन्दा बढी अन्तरले हराउन सकेन भने । केही टिमका लागि तेस्रो खेल यस्तो रहेको छ, जसको नतिजाको कुनै धेरै ठूलो अर्थ हुने छैन ।
यसपल्ट फिफाले गोल अन्तरको स्थानमा ‘हेड टु हेड’ नियम लागू गरेको छ । त्यो दुई टिम समान अंकमा छ भने । अहिलेसम्म मेक्सिको, अमेरिका, जर्मनी र अर्जेन्टिनाले आ–आफ्नो समूह जित्ने निश्चित भइसकेको छ । अर्कोतर्फ हाइटी, टर्की, ट्युनिसिया, जोर्डन र पानामा जस्ता टिमको चुनौती अन्तिम खेल अगाडि नै समाप्त भइसकेको छ । अहिलेको तेस्रो हुने उत्कृष्ट आठ टिम अर्को चरण पुग्ने नियमले थप केही जटिलता पनि ल्याएको छ । जुन टिमले सुरुमा खेल्छ, तिनीहरूको तुलनामा पछाडि खेल्ने टिमलाई फाइदा हुनेछ ।
अहिले नै के महसुस गर्न थालिएको छ भने ४८ टिमको विश्वकपबाट ३२ टिमको नकआउट चरणमा पुग्ने समीकरण कठिन मात्र छैन, यसले उत्तिकै विवाद पनि ल्याउन सक्नेछ । बरू यसको स्थानमा विश्वकपमा सहभागी संख्या बढाएर ६४ पुर्याउने हो भने त्यसले सहजता ल्याउन सक्नेछ भन्ने मत पनि अगाडि आएको छ । यस्तोमा १६ समूह हुनेछ । प्रत्येक समूहको शीर्ष दुई टिम अन्तिम ३२ को चरणमा पुग्नेछन् । तर यति धेरै सहभागी हुने विश्वकपको आयोजना आफैंमा कतिसम्म गाह्रो हुन सक्नेछ, त्यो अर्को प्रश्न हुनेछ ।
