एन्जल्स स्पोर्ट्स एकेडेमीमा बुधबार भएको फाइनलमा न्यु डायमन्डले न्यु डायमन्ड एकेडेमीलाई २५–१६, २५–९, २५–१० को सोझो सेटमा पराजित गर्यो ।
काठमाडौँ — टिपटप न्यु डायमन्ड युथ स्पोर्ट्स क्लबले मदन भण्डारी कप यू–१९ विद्यालयस्तरीय बागमती प्रदेश छात्रा भलिबल प्रतियोगिताको उपाधि जितेको छ ।
एन्जल्स स्पोर्ट्स एकेडेमीमा बुधबार भएको फाइनलमा न्यु डायमन्डले न्यु डायमन्ड एकेडेमीलाई २५–१६, २५–९, २५–१० को सोझो सेटमा पराजित गर्यो ।
मदन भण्डारी स्पोर्ट्स एकेडेमीको आयोजनामा भएको प्रतियोगितामा गणेश हिमाल तेस्रो भयो । गणेश हिमालले सरस्वती मावि हेलम्बुलाई २५–१८, २५–१६, २५–१३ ले हरायो । शीर्ष चार स्थानमा रहने टिमले क्रमशः १ लाख, ५० हजार, ३० हजार र १५ हजार रुपैयाँ पुरस्कार प्राप्त गरे ।
प्रतियोगितमा न्यु डायमन्डकी निशा महर उत्कृष्ट खेलाडी घोषित भइन् । निशाले १० हजार पुरस्कार हात पारिन् । न्यु डायमन्डकी जेनिशा विश्वकर्मा उत्कृष्ट स्पाइकर, सलिना गुरुङ उत्कृष्ट ब्लकर र कुमार राई उत्कृष्ट प्रशिक्षक चुनिए ।
न्यु डायमन्डकी गृष्मा गुरुङ उत्कृष्ट डिफेन्डर, नम्सार राना उत्कृष्ट सेटर र एलिशा श्रेष्ठ उत्कृष्ट सर्भर चुनिए । विधागत उत्कृष्ट सबैले जनही ५ हजार पुरस्कार पाए ।
विजेतालाई राष्ट्रिय खेलकुद परिषद्का पूर्व उपाध्यक्ष तथा आयोजक एकेडेमीका अध्यक्ष ध्रुव आचार्य, प्रतियोगिता संयोजक राम केसीलगायतले पुरस्कृत गरे । चारदिने प्रतियोगितामा ८ टिमले लिगकम नकआउट आधारमा प्रतिस्पर्धा गरेका थिए ।
