हेटौंडा — थाहा नगरपालिकामा सम्पन्न छैठौं थाहा गोल्डकप फुटबल प्रतियोगिताको उपाधि कुर्दन फुटबल एकेडेमी चन्द्रगिरिले उचालेको छ ।

थाहा नगरपालिका-३ ईन्द्रायणीमाईको चौरमा शनिबार कुर्दन फुटबल एकेडेमी चन्द्रागिरिले चित्लाङ एफसीलाई पेनाल्टी सुटआउटमा ४–२ गोल अन्तरले पराजित गर्दै उपाधि हात पारेको हो । उपाधिसँगै विजेता कुर्दन फुटबल एकेडेमी चन्द्रागिरीले २ लाख रुपैयाँ प्राप्त गरेको छ । उपविजेता चित्लाङ एफसीले १ लाख रुपैयाँमा चित्त बुझायो । 
निर्धारित समयमा दुवै टिमबाट एक–एक गोल भएपछि खेल बराबरीमा सकिएको थियो । चित्लाङ एफसीका लागि विश्व हायुले गोल गरे भने कुर्दनका तर्फबाट सुजित बुढाथोकीले बराबरी गोल फर्काएका थिए । त्यसपछि खेलको निर्णय पेनाल्टी सुटआउटमार्फत गरिएको थियो ।

थाहा नगरपालिकाको आयोजना तथा शिखर क्लबको व्यवस्थापनमा आयोजित उक्त प्रतियोगिताको फाइनल खेलमा उत्कृष्ट प्रदर्शन गरेका कुर्दनका गोलरक्षक सन्तोष महत ‘म्यान अफ द म्याच’ घोषित भएका थिए । व्यक्तिगत पुरस्कारतर्फ चित्लाङ एफसीका सन्तोष गोम्बा सर्वाधिक गोलकर्ता (हाइ स्कोरर) घोषित भए ।