काठमाडौँ — नेपाली मिक्स्ड मार्सल आर्ट्स (एमएमए) खेलाडी कोशिश श्रेष्ठले भारतको इन्टरनेसनल फाइट लिग (आईएफएल) मा दिल्ली टिमबाट खेल्ने भएका छन् ।

भारतमा पहिलो फ्रेन्चाइजमा आधारित एमएमए फाइट प्रतियोगिताका रूपमा परिचित आईएफएल दक्षिण एसियामै लोकप्रिय बन्दै गएको कम्ब्याट स्पोर्ट्स प्लेटफर्म हो ।

इन्डियन प्रिमियर लिग (आईपीएल), प्रो कबड्डी लिग र इन्डियन सुपर लिग (आईएसएल) जस्ता सफल फ्रेन्चाइज मोडेलमा आधारित प्रतियोगिताबाट प्रेरित आईएफएलले विभिन्न सहरका टिममार्फत यस क्षेत्रका उत्कृष्ट फाइटरलाई एउटै मञ्चमा ल्याएको छ । यसले एमएमए खेललाई व्यावसायिक र दिगो बनाउने अवसर सिर्जना गरिरहेको छ ।

हाल १–० को व्यावसायिक एमएमए रेकर्ड कायम गरेका कोशिशले दिल्ली टिमबाट प्रतिस्पर्धा गर्नेछन् । उनले मुम्बई फ्रेन्चाइजका अनुभवी फाइटर प्रचण्ड जामिल्यासँग प्रतिस्पर्धा गर्नेछन् । प्रचण्डको एमेच्योर रेकर्ड १४–४ को छ । दिल्ली र मुम्बईबीचको यो भिडन्त प्रतियोगिताकै प्रमुख आकर्षणमध्ये एक हुने अपेक्षा गरिएको छ ।