काठमाडौं — इर्भिन श्रेष्ठसहित तीन राष्ट्रिय पौडी खेलाडीले एसियाली खेलकुदका लागि भएको छनोटमा धाँधली भएको जनाउँदै पुनः छनोट गराउन माग गरेका छन् ।

उनीहरूले पूर्वसूचनाअनुसार प्रि–क्वालिफिकेसनलाई रातारात क्वालिफिकेसनमा परिणत गर्ने कार्य गैरकानुनी र खेल नियम विपरीत भएको भन्दै तत्काल सच्याउन माग गरेका छन् ।

काठमाडौंमा मंगलबार आयोजित पत्रकार सम्मेलनमा पौडीवाज इर्भिनले प्रि–क्वालिफिकेसन भनिएको खेललाई आधाभन्दा बढी खेल समाप्त भइसकेपछि बिना छाप र हस्ताक्षरको सूचना प्रकाशित गरी क्वालिफिकेसनमा बदल्नुमा ठूलो षड्यन्त्र भएको आरोप लगाए । उनले प्रि-क्वालिफिकेसनको हिट्समा पनि आधुनिक प्रविधिको प्रयोग गरी समय नलिई हाते घडीको प्रयोग गरिएकोबारे छानबिनको माग गरे ।  

नेपाल पौडी संघले २३ र २४ जेठमा तेस्रो नेपाल एक्वाटिक च्याम्पियनसिप आयोजना गरेको थियो । त्यसलाई प्रि-क्वालिफिकेसन भनी सूचना प्रकाशित गरेकामा खेलाडी छनोट ढिलो भएको बहानामा क्वालिफिकेसनमा परिणत गरी चलखेल गरिएको खेलाडी इर्भिनले बताए । उनले आफूहरू प्रमाणसहित सर्वोच्च अदालत पुगेको समेत बताए । उनले भने, ‘हामीलाई आशा छ सम्मानित सर्वोच्च अदालतले न्याय दिनेछ ।’