काठमाडौँ — जापानको आइची/नागोयामा हुने २० औं एसियाली खेलकुदका लागि टेबलटेनिस खेलाडी छनोट गरिएको छ ।

१९ सेप्टेम्बरदेखि ४ अक्टोबरसम्म हुने एसियाडका लागि शनिबार राष्ट्रिय टेबलटेनिस प्रशिक्षण केन्द्रमा छनोट प्रतियोगिता भएको थियो ।

अखिल नेपाल टेबलटेनिस संघले आयोजना गरेको दुईदिने छनोट प्रतियोगिताबाट ३–३ पुरुष/महिला खेलाडी छनोट गरिएको संघका कोषाध्यक्ष ज्याकी महर्जनले जनाएका छन् ।

पुरुषमा संयोग कपाली प्रथम, रुविन महर्जन द्वितीय र गणञ्जय दाहाल तृतीय भएर छनोट भए । महिलामा नविता श्रेष्ठ पहिलो, इभाना थापा दोस्रो र योङ्गी पौडेल तेस्रो हुँदै जापानका लागि छानिए ।

छनोट प्रतियोगितामा जेठमा सम्पन्न ४२ औं राष्ट्रिय टेबलटेनिस प्रतियोगितामा पुरुष/महिला एकलतर्फ शीर्ष ८–८ स्थानमा रहेका खेलाडीले प्रतिस्पर्धा गरेका थिए ।