काठमाडौँ —  

नेपाली एसीसी वुमन्स प्रिमियर कप क्रिकेटको क्वार्टरफाइनलबाटै बाहिरिएको छ । मलेसियामा भइरहेको प्रतियोगितामा बुधबार थाइल्यान्डले नेपाललाई ५६ रनले पराजित गर्‍यो । थाइल्यान्डले क्वालालम्पुरस्थित बायुमास ओभलमा टस जितेर पहिला ब्याटिङ गर्दै निर्धारित २० ओभरमा ४ विकेट गुमाई १ सय ३० रन बनाएको थियो । 

जवाफमा आएको नेपालले ७ विकेट गुमाई ७४ रनमात्र बनाउन सक्यो । नेपालले २०११ यता थाइल्यान्डलाई पराजित गर्न सकेको छैन । थाइल्यान्डसँगको हार नेपाली महिला क्रिकेट टोलीको असफलताको पछिल्लो शृंखला हो । नेपालले यस प्रतियोगिताको समूहचरणमा कतारलाई ८ विकेटले र भुटानलाई ५१ रनले पराजित गरेको थियो । तर हङकङसँगै समूहचरणको अन्तिम खेलमा ६९ रनको हार बेहोरेपछि नेपाली टोली प्रवल दाबेदार थाइल्यान्डसँग क्वार्टरफाइनलमा खेल्न बाध्य भएको हो । 

हङकङसँगको सो खेलमा नेपाल केवल ४० रनमा अलआउट भएको थियो, जुन नेपालको महिला ट्वान्टी–२० अन्तर्राष्ट्रियमा सबैभन्दा न्युन स्कोर पनि हो । प्रिमियर कपम सुरु हुनु ठिकअघि सम्पन्न एसियन गेम्स महिला छनोटमा शीर्ष चारमा पर्न नसकेपछि नेपाल एसियन गेम्समा पुग्न पनि असफल भएको थियो । सेमिफाइनलमा मलेसियासँग चुकेको नेपाललाई एसियन गेम्सको छनोटको तेस्रो स्थानको प्ले अफ खेलमा चीनले पनि पराजित गरेको थियो । चीनसँग नेपालको त्यो पहिलो हार थियो । 

मलेसिया भ्रमणमा कमजोर प्रर्दशन गर्दै आएको नेपालविरुद्ध बुधबार विकेटकिपर नानापात खोन्चारोइन्काईले अविजित ६२ रन बनाएपछि थाइल्यान्डले राम्रो स्कोर बनाएको थियो । उनले ५१ बल खेली ६ चौका प्रहार गरिन् । त्यस्तै फनिता मायाले २१ बलमा २ चौकासहित २६ र चनिदा सुथिरुएङले २७ बलमा १ चौकासहित १६ रन बनाइन् । नेपालबाट रुविना क्षेत्रीले ४ ओभरमा ११, रिया शर्माले ४ ओभरमा २८ र कविता कुँवरले ४ ओभरमा ३१ रन खर्चेर १–१ विकेट लिइन् ।