पाल्पा — जिल्ला क्रिकेट संघ पाल्पाको अध्यक्षमा पूर्णराज शाक्य निर्विरोध निर्वाचित भएका छन् । संघको १९ औं साधारण सभा तथा ५ औं जिल्ला अधिवेशनले शाक्यको अध्यक्षतामा ११ सदस्यीय नयाँ कार्यसमिति सर्वसम्मत रूपमा चयन गरेको हो । 

नवनिर्वाचित कार्यसमितिको उपाध्यक्षमा शैलेन्द्र भट्टराई, सचिवमा विनोद नेपाल, कोषाध्यक्षमा सचिन राना निर्विरोध भए । सदस्यहरू उपेन्द्र नेपाल, राजीव श्रेष्ठ, सुरेश गोदार, ओमबहादुर थापा, राजेन्द्रमान शाक्य, मेलिना थापा र मोना थापा चयन भएका छन् । 

कार्यक्रममा लुम्बिनी प्रदेश खेलकुद परिषद्का उपाध्यक्ष राजु महर्जनले विद्यालय तहदेखि नै क्रिकेटको महत्त्वबारे बुझाउनुपर्ने र खेलकुदको गतिविधिमा क्रिकेट समावेश गर्नुपर्ने बताए । ‘क्रिकेटप्रति सबैको आकर्षण रहेका बेला जिल्लाको क्रिकेटलाई पनि अघि बढाउन जरुरी छ,’ उनले भने, ‘युवालाई खेलकुदले व्यक्तित्व विकास, अनुशासन र नेतृत्व क्षमतामा सहयाग पुग्नेछ । त्यसैले यसको महत्त्व बुझेर अघि बढ्नुपर्छ ।’