सुर्खेत — वीरेन्द्रनगरमा जारी यू–१९ राष्ट्रिय महिला टी–२० क्रिकेट प्रतियोगिताको दोस्रो दिन कोशी प्रदेशकी टीका शाह र प्रिन्सा राना मगरको अर्धशतक मधेश प्रदेशकी सना परविनको उत्कृष्ट प्रदर्शनले ओझेलमा परेको छ।

कालुङ्चोक मैदानमा शनिबार भएको खेलमा मधेशले कोशीलाई पराजित गर्दै प्रतियोगितामा विजयी सुरुआत गर्‌यो । मधेशको जितमा सना एक्लै हाबी भइन्। उनले अविजित ५२ रनको उत्कृष्ट पारी खेल्दै टोलीलाई सहज जित दिलाइन्।

१६ ओभरको तेस्रो बलमा जितका लागि दुई रन आवश्यक रहेका बेला ४८ रनमा खेलिरहेकी सनाले चौका प्रहार गर्दै अर्धशतक पूरा गरिन् र खेल समाप्त गरिन्। उनले ४९ बलमा सात चौकासहित ५२ रन बनाइन्।

सनालाई अर्कोतर्फबाट साक्षी यादवले राम्रो साथ दिइन्। साक्षी ४६ रनमा खेलिरहेका बेला सिंगल रन लिएर स्ट्राइक सनालाई दिएकी थिइन्, जसले सनालाई अर्धशतक पूरा गर्ने अवसर जुट्यो।

एलिशा यादव र शिवानी साह छिट्टै आउट भएपछि सनासँग तेस्रो विकेटका लागि साक्षीले महत्वपूर्ण साझेदारी गरिन्। उनले ४० बलमा आठ चौकासहित ४६ रन बनाइन्।

कोशीका लागि शुभेक्षा लिम्बूले दुई विकेट लिइन्। त्यसअघि टस जितेर पहिले ब्याटिङ गरेको कोशीले निर्धारित २० ओभरमा तीन विकेट गुमाएर १२२ रन बनाएको थियो। पूर्णिमा राजवंशी शून्यमै आउट भएपछि टीका शाह र प्रिन्सा राना मगरले इनिङ्स सम्हाले।

टीकाले ३६ बलमा ११ चौकासहित ५१ रन बनाइन् भने प्रिन्साले अविजित ५५ रन जोडिन्। ६८ बल सामना गरेकी प्रिन्साले नौ चौका प्रहार गर्दै प्रतियोगिताको पहिलो अर्धशतक बनाइन्। त्यसको केहीबेरपछि टीकाले पनि अर्धशतक पूरा गरिन्।

प्रतियोगिताको पहिलो खेलमा घरेलु टोली कर्णालीलाई ५४ रनले पराजित गरेको लुम्बिनी दोस्रो खेलमा गण्डकीसँग पाँच विकेटले पराजित भयो। वीरेन्द्रनगर मैदानमा टस जितेर पहिले ब्याटिङ गरेको लुम्बिनी १८.३ ओभरमा अलआउट हुँदै ६३ रनमा समेटियो।