काठमाडौँ — साबिक विजेता बागमती प्रदेशले १६ औं केन्द्रीय राष्ट्रपति रनिङ सिल्ड खेलकुदमा च्याम्पियन ट्रफी उचालेको छ । शुक्रबार सम्पन्न प्रतियोगितामा बागमतीले ६ खेलबाट २२ स्वर्ण, २१ रजत र १३ कांस्य पदक जितेको थियो । 

सुदूरपश्चिम प्रदेशले १९ स्वर्ण, ९ रजत र १४ कांस्य जित्दै दोस्रो तथा १२ स्वर्ण, १५ रजत र १८ कांस्य जितेको लुम्बिनी प्रदेश तेस्रो बन्यो । ५ स्वर्ण, २ रजत र १८ कांस्यसहित गण्डकी प्रदेश चौथो हुँदा ४ स्वर्ण, ७ रजत र १७ कांस्यसहित कोशी प्रदेश पाँचौं भयो । ३ स्वर्ण, ६ रजत र ६ कांस्यसहित मधेश प्रदेश छैटौं तथा २ स्वर्ण, ५ रजत र १२ कांस्यसहित कर्णाली प्रदेश सातौं स्थानमा रहे ।

तीनदिने प्रतियोगितामा सात प्रदेशबाट ६ सय ८६ खेलाडीले एथलेक्टिस, भलिबल, कबड्डी, तेक्वान्दो, कराते र उसुमा प्रतिस्पर्धा गरेका थिए ।

पदक विजेतालाई करिब १२ लाख रुपैयाँ पुरस्कार वितरण गरिएको आयोजक राष्ट्रिय खेलकुद परिषद् प्रतियोगिता व्यवस्थापन तथा सञ्चालन समितिका सचिव मीनकुमार शर्माले जनाएका छन् ।

प्रतियोगिताको १७ औं संस्कारण कोशी प्रदेशमा १९–२२ फागुनमा हुने भएको छ ।

भलिबलमा गण्डकी र बागमती विजेता

भलिबलको उपाधि गण्डकी र बागमतीले जितेका छन् । गण्डकी छात्र र बागमती छात्रामा च्याम्पियन भए । निर्णायक सेटमा विजेता बनेका दुवै टोलीले लुम्बिनीलाई पराजित गरेको थियो । त्रिपुरेश्वरस्थित राखेप कभर्डहलमा सम्पन्न छात्र फाइनलमा गण्डकीले लुम्बिनीलाई २०–२५, २४–२६, २५–२२, २५–१७, १५–११ को सेटमा पराजित गरे । सुदूरपश्चिम तेस्रो भयो । छात्रातर्फ बागमतीले लुम्बिनीलाई २१–२५, २२–२५, २५–१२, २५–२१, १५–८ ले हरायो । कर्णाली तेस्रो भयो ।

कबड्डीमा लुम्बिनीको वर्चस्व

लैनचौरस्थित राष्ट्रिय टेबलटेनिस प्रशिक्षण केन्द्रमा भएको कबड्डीको छात्र/छात्रा दुवैमा लुम्बिनीले उपाधि जित्यो । दुवैमा लुम्बिनीको फाइनल प्रतिद्वन्द्वी बागमती थियो ।

छात्र फाइनलमा लुम्बिनीले बागमतीलाई ३७–३२ अंकले पराजित गर्‍यो । कर्णाली र गण्डकी संयुक्त तेस्रो भए । छात्राको उपाधि भिडन्तमा लुम्बिनीले बागमतीलाई ३५–२९ ले हरायो । सुदूरपश्चिम र मधेश तेस्रो स्थानमा रहे ।