काठमाडौं — तेस्रो एसियन ई–लर्निङ ‘जयकुमारनाथ शाह स्मृति यु–१६ अन्तर स्कुल क्रिकेट प्रतियोगितामा बिहीबार अपी र केएमसी स्कुलले लगातार दोस्रो जित पाएको छ ।

दुवै क्वाटरफाइनलमा पुग्न सफल भए । बिहीबारै संस्कृति, विस्डम र अक्षरिका स्कुल पनि विजयी भए । माथिल्लो मूलपानी क्रिकेट मैदानमा केएमसीले ग्यालेक्सी पब्लिक स्कुललाई ६२ रनले हरायो । टस जितेको केएमसीले २० ओभरमा ५ विकेट गुमाएर १८५ रन बनायो । विधान सापकोटाले ५५ बलमा १०५ रनको शतकीय इनिङ्स खेले । अविनराज यादवले २४ रनको योगदान दिए ।

१८६ रनको लक्ष्य पाएको ग्यालेक्सी १९.३ ओभरमा १२३ रनमै समेटियो । खुशवेन्द्र साहले ५२ र वैभवनारायण साहले अविजित ३० रन बनाए । केएमसीका खुशबेन्द्र साहले ३ विकेट लिए भने विधान लुइँटेल र अमितकुमार दासले २–२ विकेट लिए । विधान ‘प्लेयर अफ द म्याच’ घोषित भए ।

सोही मैदानमा अपीले ज्ञान मन्दिरलाई १९१ रन अन्तरले पराजित गर्‍यो । अपीले २० ओभरमा ३ विकेट गुमाएर २ सय ६५ रनको विशाल योगफल तयार गर्‍यो । कुसुम प्रसादले ६७ बलमा १२० रन र युगान्त कार्कीले ३५ बलमा ८२ रन बनाए । जवाफमा ज्ञान मन्दिर १८ ओभरमा ७४ रनमै समेटियो । अपीका विशाल बुढा र कुसुम प्रसादले २–२ विकेट लिए । कुसुम प्लेयर अफ द म्याच घोषित भए ।