सुर्खेत — कर्णाली प्रदेशमा यू–१९ राष्ट्रिय महिला क्रिकेट प्रतियोगिता आयोजना हुने भएको छ।

नेपाल क्रिकेट संघ (क्यान) र कर्णाली प्रदेश क्रिकेट संघको आयोजनामा जेठ २२ देखि असार १ गतेसम्म सञ्चालन हुने प्रतियोगितामा सातै प्रदेशका टोली सहभागी हुनेछन्।

प्रतियोगिता सन् २०२७ मा हुने आईसीसी यू-१९ महिला विश्वकपका लागि नेपाली टोली छनोटको महत्त्वपूर्ण आधार बन्ने अपेक्षा गरिएको आयोजकले जनाएको छ। यसले देशभरका प्रतिभावान् महिला क्रिकेटरलाई आफ्नो क्षमता प्रदर्शन गर्ने अवसर प्रदान गर्नुका साथै कर्णालीलाई राष्ट्रिय खेलकुद गतिविधिको केन्द्रका रूपमा स्थापित गर्न सहयोग पुग्ने विश्वास गरिएको छ।

बुधबार आयोजित पत्रकार सम्मेलनमा कर्णाली प्रदेश क्रिकेट संघका कोषाध्यक्ष पदमबहादुर खड्काले प्रतियोगिताको तयारी अन्तिम चरणमा पुगेको जानकारी दिए। खेल मैदान, आवास, यातायात, सुरक्षा तथा स्वास्थ्य सेवासहित आवश्यक व्यवस्थापनको काम लगभग पूरा भएको उनले बताए।