सुनसरी — प्रदेश खेलकुद विकास बोर्ड कोशी प्रदेशको आयोजनामा भइरहेको १६ औं प्रदेशस्तरीय राष्ट्रपति रनिङ शिल्ड प्रतियोगिताको पहिलो दिन एथलेटिक्समा मोरङ र झापाले उत्कृष्ट सुरुआत गरेका छन् । 

इटहरी रंगशालामा जारी प्रतियोगिताअन्तर्गत छात्रा १५ सय मिटर दौडमा मोरङकी मन्दिरा महताराले स्वर्ण, धनकुटाकी एनिशा थापाले रजत र तेह्रथुमकी अरुणा लिम्बूले कास्य पदक जित्न सफल भए । छात्र १५ सय मिटर दौडमा ताप्लेजुङका अमिर लिम्बूले स्वर्ण, पाँचथरका समिर आङदेम्बेले रजत र ओखलढुङ्गाका गुणराज दाहालले कास्य पदक जिते । छात्रा १ सय मिटर दौडमा मोरङकी विनिशा रिजालले स्वर्ण, झापाकी संगीता रसाइलीले रजत र झापाकै अस्मिता लाम्गादेले कास्य पदक जिते । 

छात्र १ सय मिटर दौडमा झापाका सुवास दर्जीले स्वर्ण, सुनसरीका नितेश गच्छदारले रजत र मोरङका सुवेक थापाले कास्य पदक जिते । त्यसैगरी छात्र सटपुट थ्रोमा धनकुटाका डेविट लिम्बूले स्वर्ण, ताप्लेजुङका दिलीप लिम्बूले रजत र तेह्रथुमका दिनेश परियारले कास्य पदक जिते । छात्रा सटपुट थ्रोतर्फ झापाकी सिम्रन राईले स्वर्ण, पाँचथरकी सुस्मिता सिवुले रजत र संखुवासभाकी मनीषा राईले कास्य पदक जिते ।