काठमाडौँ — सातौं राष्ट्रिय फेन्सिङ प्रतियोगितामा आइतबार सिनियर महिला फोयलको टिम इभेन्टमा एपीएफ र पुरुषमा त्रिभुवन आर्मी टिम च्याम्पियन बनेका छन् ।

सातदोबाटोस्थित तेक्वान्दो एकेडेमीको हलमा सम्पन्न प्रतियोगिताअन्तर्गत महिला फोयल टिम इभेन्टमा अनिता अधिकारी, उर्मिला लामा, उर्मिला माझी र आइसा श्रेष्ठको एपीएफ टिमले स्वर्ण पदक जितेको हो । निश्चल मगर, सुबिना मगर, समृद्धि मगर र आयुस्का पोखरेल सहभागी गण्डकीले रजत पदक जित्यो । सुदूरपश्चिमले कांस्य पदक हासिल गरे । सुदूर टिमबाट इशारा थापा, लक्ष्मी चौधरी र पूजा कुँवरले प्रतिस्पर्धा गरेका थिए ।

सिनियर पुरुष फोयल टिम इभेन्टमा स्वर्ण जित्ने आर्मीबाट अनुप भण्डारी, नरेन्द्र धामी, भुवन मलिक र वीरसिंह शाहीले खेलेका थिए । गण्डकी टिम रजत पदक जित्न सफल भयो । बागमती र सुदूरपश्चिमले संयुक्त तेस्रो स्थान हासिल गरे ।

एपीएफले सिनियर महिला इपी टिम इभेन्टमा पनि स्वर्ण पदक जित्यो । एपीएफलाई स्वर्ण दिलाउनेमा तुलसा बुढाथोकी, माया चौधरी, अनिता कार्की र जानुका स्याङतान थिए । त्रिभुवन आर्मी क्लब दोस्रो तथा सुदूरपश्चिम र गण्डकी प्रदेश संयुक्त तेस्रो स्थान रहे ।