काठमाडौँ — इरानले काभा महिला भलिबल च्याम्पियनसिपमा लगातार दोस्रो पटक उपाधि जितेको छ ।

त्रिपुरेश्वरस्थित राखेप कभर्डहलमा शुक्रबार च्याम्पियनसिपको फाइनलमा इरानले कजाकस्तानलाई ३–१ सेटले पराजित गर्दै उपाधि रक्षा गरेको हो । इरानले यस च्याम्पियनसिपमा कजाकस्तानलाई दोस्रो पटक हराएको हो । टोलीले समूह चरणमा सोझो सेटमा नतिजा निकालेको थियो ।

नेपाली भूमिमा च्याम्पियन बन्दा इरानले फाइनलमा २५–१८, १९–२५, २५–१५, २५–२१ को सेटमा सफलता पाएको थियो ।

गत वर्ष तास्केन्दमा इरानले आयोजक उज्वेकिस्तानलाई सोझो सेटमा हराएर उपाधि जितेको थियो । कजाकस्तान भने यस च्याम्पियनसिपमा पहिलो पटक सहभागी टोली हो ।

आयोजक नेपालले भने च्याम्पियनसिपमा तेस्रो स्थान पनि गुमाएको छ । शुक्रबारै तेस्रो स्थानका लागि भएको खेलमा नेपाली टोली चिरप्रतिद्वन्द्वी भारतसँग ३–१ को सेटमा पराजित थियो ।

नेपाल र भारत दुवै सेमिफाइनलमा पराजित भएपछि तेस्रो स्थानका लागि भिडेका थिए । पहिलो दुई सेट गुमाएको नेपालले तेस्रो सेटमा पुनरागमन गरेको थियो तर, त्यसलाई कायम राख्न सकेन । नेपालले खेल २२–२५, २३–२५, २५–१५, २२–२५ ले गुमाएको हो । यो हारले नेपाली टोलीको एसिया कप पुग्ने सपना पूरा हुन सकेन । लिग चरणमा एकै समूहमा रहेको नेपालले भारतसँगको खेल ३–२ को सेटमा गुमाएको थियो ।

निरुता ठगुन्नाको कप्तानीमा रहेको नेपालले युवा खेलाडीलाई लिएर प्रतियोगितामा उत्रेको थियो । नेपालका प्रशिक्षक जगदीश भट्टले च्याम्पियनसिपमा ठोस उपलब्धिको रूपमा सफलता प्राप्त गर्न नसके पनि युवा खेलाडीले घरेलु भूमिमा अन्तर्राष्ट्रिय म्याच अनुभव बटुल्ने मौका पाएको बताए ।