राजस्थानका वैभव सूर्यवंशीले आईपीएलको एक सिजनमै ६५ छक्का हानेर क्रिस गेलको पुरानो कीर्तिमान तोडेका छन्, उनै गेलले वैभवलाई 'नयाँ सिक्स मसिन' को संज्ञा दिएका छन् ।
What you should know
काठमाडौँ — जमैकन लिजेन्ड क्रिस गेलले राजस्थान रोयल्सका युवा खेलाडी वैभव सूर्यवंशीलाई 'न्यु सिक्स मसिन' को संज्ञा दिएका छन् । आईपीएलको इलिमेनटर राउन्डमा सनराइजर्स हैदराबादसँगको खेलमा वैभवको सानदार ब्याटिङपछि गेलले वैभवलाई 'नयाँ सिक्स मसिन' को संज्ञा दिएका हुन् ।
गेलले सोसल मिडिया प्लेटफर्म एक्समा लेखेका छन्, 'वैभव सानदार खेलाडी हुन् । यी युवा खेलाडीले भरपुर मनोरन्जन दिलाए । नयाँ सिक्स मसिन ।'
वैभवले आईपीएलको यसै सिजनमा गेलको रेकर्डसमेत तोडेका छन् । उनी अब आईपीएलको एउटै सिजनमा सबैभन्दा बढी छक्का हान्ने खेलाडी बनेका छन् । उनले यो सिजनमा ६५ छक्का हानेका छन् । गेलले सन् २०१२ को आईपीएल सिजनमा ५९ छक्का हानेका थिए । यो रेकर्ड बनाउन गेलले ४५६ बलको सामना गरेका थिए । तर वैभवले भने मात्र २६६ बलमै गेलको रेकर्ड तोड्न सफल भए ।
What a phenomenal player Vaibhav is. Great entertainment young man! New Six machine @IPL pic.twitter.com/ofElAousF7
— Chris Gayle (@henrygayle) May 27, 2026
बिहीबार वैभवले १६ बलमै अर्धशतक हानेका थिए । उनी २९ बलमा ५ चौका र १२ छक्कासहित ९७ रन बनाउँदै आउट भएका थिए । बिहीबार वैभव आईपीएलमा अर्को रेकर्ड बनाउनबाट भने चुके । उनी सबैभन्दा छिटो(२९ बलमा) शतक हान्ने खेलाडी हुन सक्थे । तर ९७ रन बनाएको अवस्थामा क्याचआउट हुन पुगे । आईपीएलमा फास्टेस्ट सेन्चुरीको रेकर्ड गेलकै नाममा(३० बलमा) रहेको छ ।
१५ वर्षीय वैभव आईपीएल इतिहासमा सबैभन्दा कम उमेरमै एक सिजनमै ६ सय रन पूरा गर्ने खेलाडीसमेत बनेका छन् । उनले बिहीबारको खेलमा समेत गरेर ६८० रन बनाएका छन् । यसअघि २०१८ को आईपीएल सिजनमा ऋषभ पन्तले २१ वर्षको उमेरमा ६ सय रन पूरा गरेका थिए ।
वैभवले अप्रिल १९, २०२५ मा लखनऊ सुपर जायन्ट्सविरुद्ध १४ वर्ष२३ दिनको उमेरमा डेब्यु गरेका थिए । डेब्यु खेलको पहिलो बलमै उनले छक्का हानेका थिए । उक्त खेलमा उनले २० बलमा ३४ रन बनाएका थिए । उक्त सिजनमा उनले ७ खेलमा २५२ रन बनाएका थिए । घरेलु मैदान, जयपुरमा अप्रिल २८, २०२५ मा गुजरात टाइटन्सविरुद्धको खेलमा उनले शतक हानेका थिए । उनले ३५ बलमै सय रन बनाएका थिए । उक्त खेलमा उनले ३८ बलमा १०१ रन बनाए । उनी आईपीएलमा शतक हान्ने सबैभन्दा कान्छा खेलाडी पनि हुन् ।
वैभवको सानदार प्रदर्शनपछि महान क्रिकेटर सचिन तेन्दुलकर भन्छन्, 'वैभव सूर्यवंशीको ब्याट स्विङ असाधारण छ । अझ उल्लेखनीय कुरा त उनले खुट्टातिर आएका बल खेल्न अगाडिको खुट्टा कति सुन्दर ढंगले हटाएर ठाउँ बनाउँछन् भन्ने हो ।' उनले बिहीबार वैभवको इनिङ्स 'अद्भुत' रहेको बताएका छन् ।
Vaibhav Sooryavanshi’s bat swing has been outstanding. What’s even more remarkable is how beautifully he clears his front foot to create room for balls aimed at his legs. This freedom allows him to play the way he does.
— Sachin Tendulkar (@sachin_rt) May 27, 2026
That innings was nothing short of spectacular!
