काठमाडौँ — नेपाली गल्फर सदभाव आचार्यसहित भारतका निखिल पाण्डे र श्रीलंकाका के दानुसान बुधबार १२ औं नेपाल अन्तर्राष्ट्रिय एमेच्योर गल्फ च्याम्पियनसिपमा ३ अन्डर ६९ सहित संयुक्त शीर्षस्थानमा रहेका छन् ।

उनीहरूले नेपालका बलराम पौडेललाई २ स्ट्रोकले पछि पारे । बलराम १ अन्डर ७१ सहित चौथो स्थानमा छन् । इभन पार ७२ को स्कोरमा भुटानका डेचेन लेन्डुप र भारतका भीभान उभायकर संयुक्त पाँचौ स्थानमा रहे । १ ओभर ७३ सहित श्रीलंकाका चनाका परेरा, नेपालका राहुल विश्वकर्मा र बंगलादेशका मोहम्मद सरिफ संयुक्त सातौं स्थानमा छन् ।

डिफेन्डिङ च्याम्पियन सदभावले ३ अन्डर ३३ मा फ्रन्टनाइन सक्दा तेस्रोदेखि छैटौं होलमा लगातार चार बर्डी प्रहार गरे । आठौं होलमा एक शट खेर फालेका उनले १३ औं होलको बर्डीविरुद्ध १५ औं होलको बोगीले ब्याकनाइन इभन पार ३६ खेले ।

पाँचौंदेखि सातौं होलको बर्डीले निखिल बोगीरहित ३ अन्डर ३३ मा फ्रन्टनाइन टुंग्याउन सफल रहे । यसपछि १२ र १५ औं होलमा सट बचाउँदा १३ र १४ औं होलमा बोगी खेपे । उनले ब्याकनाइन इभन पार ३६ मा सके ।

बंगलादेशका दानुसानले दोस्रो, चौथो, सातौं र नवौं होलको बर्डीले फ्रन्टनाइन ४ अन्डर ३२ खेले । उनले १५ र १८ औं होलमा शट खेर फाल्दा १२ औं होलको बर्डीले ब्याकनाइन १ ओभर ३७ मा सकेका थिए ।

महिलातर्फ तारा कार्की चित्रकार ४ ओभर ७६ सहित अभानी राईलाई ५ स्ट्रोकले पछि पार्न सफल रहिन् । पाँचौं, सातौ, आठौं र नवौं होलको बोगीले फ्रन्टनाइन ४ ओभर ४० मा पूरा गरिन् । यसपछि १३ र १६ औं होलमा बर्डी प्रहार गरे पनि ११ र १७ औं होलको बोगीले ब्याकनाइन इभन पार ३६ मा सकिन् । ९ ओभर ८१ सहित अभानी दोस्रो र १३ ओभर ८५ सहित सम्झना खत्री तेस्रो स्थानमा छन् ।