काठमाडौँ — घरेलु टोली नेपालले काभा महिला भलिबल च्याम्पियनसिपको सेमिफाइनलमा इरानलाई प्रतिद्वन्द्वी पाएको छ ।

त्रिपुरेश्वरस्थित राखेप कभर्डहलमा सोमबार आफ्नो समूहको अन्तिम खेलमा इरानले काजकिस्तानलाई हराएर समूह ‘बी’ विजेता बनेको थियो । दुवै अन्तिम चारमा प्रवेश गरिसकेको अवस्थामा इरानले प्रतिस्पर्धात्मक खेलमा काजकिस्तानमाथि सोझो सेटमै जित पाएको हो । अपराजित इरानले २५–२२, २५–२०, २५–२२ को नजिता निकालेको थियो । हारले काजकिस्तान समूह उपविजेता बन्यो ।

गत वर्ष उज्वेकिस्तानमा भएको यस च्याम्पियनसिपको पहिलो संस्करणमा इरानले नै उपाधि जितेको थियो । फाइनलमा आयोजक उज्वेकिस्तानलाई सोझो सेटमा हराएको थियो । सन् २०२४ मा काभा महिला भलिबल नेसन्स लिगको नाममा आयोजित यसै प्रतियोगितामा भारत विजेता बनेको थियो । काठमाडौंमा भएको उक्त प्रतियोगितामा नेपाल भारतसँग ३–२ को सेटमा पराजित भएको थियो ।