कपिलवस्तु — गठिलो जीउडाल । आकर्षक र बलिष्ठ शारीरिक अंग । देख्दै ‘आइरन म्यान’ जस्ता छन् । शारीरिक रूपमा शरीरलाई स्वस्थ बनाउँदै आकर्षक जीउडाल बनाउन उनले स्ट्रेन्थलिफ्टिङ खेल नेपालमा भित्र्याए । निरन्तर संघर्ष र मिहिनेत गरे । गतिलो सफलता हात लगाए । उनी हुन्– कपिलवस्तु नगरपालिका–५, सागरटोलका ५० वर्षीय जीवन गिरी । उनले शनिबारमा भारतको सिक्किममा ‘आइरन म्यान अफ नेपाल’को उपाधि पाएका हुन् ।

सिक्किम स्ट्रेन्थलिफ्टिङ एसोसिएसनद्वारा मंगन जिल्लामा आयोजित दुईदिने ८ औं स्टेट सिक्किम स्ट्रेन्थलिफ्टिङ एण्ड आईबीपी च्याम्पियनसीप प्रतियोगिता उद्घाटनका अवसरमा गिरीलाई उक्त उपाधि प्रदान गरिएको हो ।

प्रतियोगिताको विशेष अतिथिका रूपमा बोलाएर सिक्किम राज्यका कोअपरेटिभ सप्लाई एण्ड मार्केटिङ फडरेसन (सिम्फेड)का अध्यक्ष तेन्जिङ दोर्जे भुटियाले गिरीलाई उपाधिसहित सम्मानपत्र प्रदान गरेका हुन् । आइतबार सम्पन्न प्रतियोगितामा सिक्किमका समाज कल्याण, महिला तथा बालबालिका मन्त्री सम्दुप लेप्चाले आफ्ना तर्फबाट १० हजार नगद भारुले गिरीलाई पुरस्कृत पनि गरे । मन्त्री लेप्चा सिक्किम स्ट्रेन्थलिफ्टिङ एसोसिएसनका प्रमुख संरक्षक हुन् । 

गिरीले सीमित स्रोत साधनमा सानो उमेरदेखि गरेको लगन, मिहिनेत र संघर्षको परिणाम अहिलेको सम्मान भएको आइरन म्यान अफ सिक्किमको उपाधि पाएका पेमादोर्जे भुटियाले बताए । आफ्ले स्ट्रेन्थलिफ्टिङमा भारतको नाम विश्वभरि चिनाएजस्तै गिरीले नेपालको नाम फैलाएका छन् । ‘छोटो समयमा गिरीले नेपालमा स्ट्रेन्थलिफ्टिङ खेल भित्र्याएर गरेको प्रगति लोभलाग्दो छ,’ उनले भने, ‘त्यही भएर उनलाई सिक्किमे खेलाडीले सम्मान गरेका हुन् ।’ 

२०४५/४६ तिर सितिरियो करा“तेबाट खेल जीवन सुरु गरेका उनी निरन्तरको लगन र मिहिनेतले शारीरिक सुगठनको राष्टि्रयदेखि स्ट्रेन्थलिफ्टिङ विश्व च्याम्पियन बने । साथीहरूको उक्साहटमा लागेर शरीर बनाउन वेट लिफ्टिङ गर्न थालेका उनले अहिले खेलबाट धेरै गर्न सकिन्छ भन्ने देखाएका छन् । उनले आफ्नोमात्र नभई स्ट्रेन्थलिफ्टिङ खेलले मुलककै नाम विश्वमा चिनाउन पाउ“दा हर्ष र खुसीको सीमा नभएको बताए । 

उनी नेपालमा शारीरिक सुगठनको ओलम्पिक मानिने धर्मश्री उपाधिदेखि स्ट्रेन्थ लिफ्टिङ विश्व च्याम्पियन बने । उनी २०२३ मा भारतको हैदरावादमा वर्ल्ड  स्ट्रेन्थलिफ्टिङ एसोसिएसनद्वारा आयोजित १० औं वर्ल्ड च्याम्पियनसिप प्रतियोगितामा १ सय १५ केजी प्लस तौल समूहमा अमेरिकी खेलाडीलाई पराजित गरेर च्याम्पियन बनेका थिए । प्रतियोगितामा १९ देशका खेलाडी सहभागी थिए । स्ट्रेन्थलिफ्टिङको राम्रो र उत्कृष्ट खेलाडी हुँदा उनी स्ट्रेन्थलिफ्टिङको अन्तर्राष्ट्रिय जज (रेफ्री)को मान्यता पनि पाएका छन् । २०२४ मा कजाकस्तानमा भएको ११ औं वर्ल्ड च्याम्पियनसिप प्रतियोगितामा निर्णायक बनेका थिए । 

२०२० मा वल्र्ड पावरलिफ्टिङ फेडरेसन (डब्लूपीएफ) एसिया उपाध्यक्षसमेत भए । अहिले त्यो छाडेर उनी वर्ल्ड स्ट्रेन्थलिफ्टिङ एसोसिएसनको ९ सदस्यीय कार्यकारी समितिका सदस्य छन् । उनले नै २०२१ मा नेपालमा स्ट्रेन्थलिफ्टिङ खेल भित्र्याएका हुन् । उनी नेपाल स्ट्रेन्थलिफ्टिङ एसोसिएसनका संस्थापक महासचिव पनि हुन् । उनले २०२३ मा काठमाडौंमा स्ट्रेन्थलिफ्टिङको अन्तर्राष्टि्रय प्रतियोगिता गराएका थिए । नेपालसहित भारत, पाकिस्तान, ताजकिस्तान र किर्गिस्तानका खेलाडी सहभागी थिए ।

लुम्बिनी प्रदेश सरकारले उनलाई खेल क्षेत्रमा पुर्‍याएको योगदानको कदर गर्दै ०७९ मा प्रदेश रत्न विभूषण पनि प्रदान गरेको थियो । खेलकुदकै माध्यमबाट जोडिएर चीन, बेलायत, जापान, अस्ट्रेलिया, मलेसिया र बंगलादेश लगायत १८ बढी मुलुक घुमेका छन् । खेल क्षेत्रमा लागेर नाम र दाम दुवै कमाए । ‘आफ्नो कर्मबाट सन्तुष्ट छु । अरुलाई चिनाउनु पर्दैन,’ उनले भने, ‘सबैले मेरो कामले चिन्छन् ।’_{जीवन गिरी}

भारत, नेपालमा जिम बडी बिल्डिङमा पुरस्कार जितेको समाचार पत्रिकामा आएपछि साउदी अरबमा जिम क्लब संचालन गर्ने व्यवसायी जीवनलाई खोज्दै नेपाल आए । साउदी र बहराइनमा झण्डै १५ वर्ष जिम कोच भएर काम गरे । सन् २०१५ मा नेपाल फर्केर फेरि उनी पुरानै कर्म जिम र बडी बिल्डिङमा लागेका हुन् ।