भैरहवा — २४औं संस्करणको ‘पञ्चकन्या रुपन्देही सुपरलिग’को उपाधि वेष्टर्न क्रिकेट क्लब बुटवलले हात पारेको छ ।

शनिबार भैरहवास्थित सिद्धार्थ क्रिकेट मैदानमा भएको फाइनल खेलमा लुम्बिनी खुकुरी क्लब भैरहवालाई ४५ रनले पराजित गर्दै वेष्टर्नले उपाधि हात पारेको हो ।

वेष्टर्नको यो बिजयी यात्रा चौथो पटक हो । गत सिजनकोसुपरलिग पनि वेष्टर्नले नै जितेको थियो ।

उपाधि विजेता वेष्टर्नले १ लाख १ रुपैयाँ र उपविजेता लुम्बिनी खुकुरीले ५० हजार १ रुपैयाँ नगद पुरस्कार प्राप्त गरेका छन् ।

टस जितेर ब्याटिङमा आएको वेष्टर्नले निर्धारित ५० ओभरमा ४८ ओभर २ बल खेल्दै सबै विकेट गुमाएर १ सय ८२ रन बनायो । उसका लागि देव खनालले ३०, दीपेश रोक्काले २७, सन्देश थापाले २६, सुमित नेवारले २०, रन्जित खत्रीले १९, प्रज्जवल थापाले १४, कलम अली मुसलमानले १३, अभिशेष गौतम र सागर गैरेले १०–१० रन बनाए ।

बलिङमा लुम्बिनी खुकुरीका बैतुल्लाह खानले ३, अजयकुमार चौहान र शाह आलमले २–२ तथा शंकर राना र सुजन रानाभाटले १–१ विकेट लिए ।

जवाफी ब्याटिङमा आएको लुम्बिनी खुकुरी २४ ओभर ५ बलमा १ सय ३७ रन बनाउँदा अलआउट भयो । उसलाई सस्तैमा रोक्न वेष्टर्नका अभिशेष गौतमले ८ ओभर ५ बल बलिङ गर्दै २ मेर्डनसहित ३६ रन खर्चेर सर्वाधिक ७ विकेट लिए । यस्तै, सुझाव थापाले ३ विकेट हात पारे । खुकुरीका समीर अली मुसलमानले ६७ र शंकर रानाले ४७ रन बनाए । अभिशेष गौतम म्यान अफ द फाइनलबाट पुरस्कृत भए ।

प्रतियोगितामा वेष्टर्नका अभिशेष गौतम म्यान अफ द सिरिज भई १५ हजार रुपैयाँ प्राप्त गरे । यस्तै, मेलवर्न क्रिकेट एण्ड स्पोर्टिङ क्लबका विपिन आचार्य बेष्ट ब्याटर, मेलवर्नकै अशोक धामी बेष्ट बलर र वेष्टर्नका सुझाव थापा उदयीमान खेलाडी घोषित भए । उनीहरु तीनै जनाले जनही ५ हजार रुपैयाँ प्राप्त गरे ।