त्रिपुरेश्वरस्थित राखेप कभर्डहलमा भर्खर सम्पन्न खेलमा समूह ‘ए’ मा रहेको भारतले माल्दिभ्सलाई सोझो सेटमा पराजित गरेको थियो ।
काठमाडौँ — प्रतियोगिताको दाबेदार भारतले शनिबार काभा महिला भलिबल च्याम्पियनसिपमा दोस्रो जित हात पार्दै सेमिफाइनलमा स्थान बनाएको छ ।
त्रिपुरेश्वरस्थित राखेप कभर्डहलमा भर्खर सम्पन्न खेलमा समूह ‘ए’ मा रहेको भारतले माल्दिभ्सलाई सोझो सेटमा पराजित गरेको थियो ।
भारतले शुक्रबार नेपालविरुद्ध पाँच सेटमा सनसनीपूर्ण जित हात पार्दै सफल सुरुआत गरेको थियो ।
माल्दिभ्सविरुद्ध भारतले २५–९, २५–१४, २५–१७ को सोझो सेटमा विजय नतिजा निकालेको हो । माल्दिभ्सको यो दोस्रो हार हो ।
माल्दिभ्स शुक्रबार अबेर सम्पन्न खेलमा किर्गिस्तानसँग पनि सोझो सेट २५–१९, २५–१६, २५–२२ ले पराजित भएको थियो ।
किर्गिस्तानले आजै घरेलु टोली नेपालविरुद्ध खेल्नेछ । एक खेल गुमाइसकेकाले नेपाललाई किर्गिस्तानविरुद्ध विजय लय समात्नुपर्नेछ । अब खेल गुमाएको स्थितिमा नेपालको सेमिफाइनल यात्राका गाह्रो बन्नेछ ।
यस समूहमा दुई खेल जितेको भारत ५ अंकसहित शीर्ष स्थानमा छ । किर्गिस्तानको ३, नेपालको १ अंक हुँदा माल्दिभ्स अंकविहीन छ ।
नेपाल र किर्गिस्तानबीचको खेल अपरान्ह ५ बजे हुनेछ । नेपाली टोली निरुता ठगुन्नाको कप्तानीमा उत्रनेछ ।
शनिबार पहिलो खेलमा समूह ‘बी’ अन्तर्गत काजकिस्तानले श्रीलंकालाई सोझो सेटमा हराएको थियो । काजकिस्तानले २५–९, २५–१८, २५–१५ को नतिजा निकालेको थियो । यस समूहका अर्को दुई टोलीमा बंगलादेश र इरान हुन् । इरानले सोझो सेटमा जित पाएको थियो ।
सेन्ट्रल एसियन भलिबल एसोसिएसन (काभा) को कार्यक्रम अन्तर्गत नेपाल भलिबलको संघको आयोजनामा भएको काभा च्याम्पियनसिपमा सेन्ट्रल एसियाका ८ राष्ट्रको सहभागिता छ ।
