कप्तान निरुता ठगुन्नाको नेतृत्वमा नेपाली टोलीले घरेलु दर्शकको समर्थनमा उपाधि जित्ने लक्ष्यसहित भारतजस्तो बलियो टिमसँग पहिलो खेल खेल्दैछ।
What you should know
काठमाडौँ — काभा महिला भलिबल च्याम्पियनसिप त्रिपुरेश्वरस्थित राखेप कभर्डहलमा शुक्रबार सुरू हुनेछ । च्याम्पियनसिपका लागि सम्पूर्ण तयारी पूरा भएको आयोजक नेपाल भलिबल संघले जनाएको छ
च्याम्पियनसिपमा एफआईभीबीको सेन्ट्रल एसियाभित्र रहेका ८ राष्ट्र नेपालसहित इरान, किर्गिस्तान, भारत, श्रीलंका, बंगलादेश, माल्दिभ्स र काजकिस्तानको सहभागिता रहनेछ । च्याम्पियनसिप १५ जेठसम्म चल्ने प्रतियोगिता एफआईभीबी वरीयताको भएकाले सहभागी सबै राष्ट्रका महत्त्वपूर्ण बन्नेछ ।
बिहीबार खेलस्थलमा आयोजित प्रिम्याच कन्फ्रेन्समा आठै राष्ट्रका कप्तानले च्याम्पियनसिपका लागि आफ्नो तयारीबारे जानकारी दिँदै उत्कृष्ट प्रदर्शन गर्नका लागि उत्साही रहेको बताएका थिए ।
दुई पटकको च्याम्पियन नेपाललाई यसपालि घरेलु भूमिमा पनि उपाधि जित्ने रहनेछ । नेपालले शुक्रबार उद्घाटन दिन निकट प्रतिद्वन्द्वी भारतको सामना गर्नेछ । नेपालको ‘ए’ समूहमा भारतसहित किर्गिस्तान र माल्दिभ्स छ । अर्को ‘बी’ समूहमा इरान, श्रीलंका, बंगलादेश र काजकिस्तान रहेको छ ।
नेपालको कप्तानमा निरुता ठगुन्ना छिन् । उनको कप्तानीमा नेपालले पहिलोपल्ट अन्तर्राष्ट्रिय प्रतियोगिता खेल्दै छ । उनले तयारी छोटो रहे पनि राम्रो भएको बताउँदै घरेलु दर्शकको समर्थनका कारण थप उत्साही भएको बताइन् । राष्ट्रिय टोलीमा धेरै नयाँ भए पनि सधैं सँगै खेलिरहेकाहरू नै भएकाले टिम समन्वय राम्रो भएको उनको भनाइ थियो । उनले भनिन्, ‘हाम्रो टिम तयारी राम्रो छ, प्रदर्शनको पक्ष कोर्टमा देखिने छ ।’
साबिक विजेतासमेत रहेको भारतीय टोलीकी कप्तान नन्दना कालाप्पीले नयाँ प्रशिक्षकका साथ छोटो तयारीका बावजुद आए पनि उपाधि रक्षा गर्नेमा आफ्नो टोली विश्वस्त रहेको बताइन् ।
नेपाली टोलीमा कप्तान निरुतासहित स्पाइकरमा उषा भण्डारी, सलिना बुढा मगर, कामना विष्ट, रिमा कुँवर, मीना सुना, सेटरमा प्रगति नाथ र जसना महतो, लिबेरोमा सलिना श्रेष्ठ, शान्ति तामाङ, ब्लकरमा सुमित्रा रेग्मी, सुनिता खत्री, वसन्ती साउद र अलिशा मानन्धर छन् । टोलीका मुख्य प्रशिक्षकमा जगदीश भट्ट रहेका छन् ।
