सुनसरी — नेपाली क्रिकेटका अम्पायर भाष्कर अर्यालको निधन भएको छ । विराटनगर–४ निवासी ४६ वर्षीय अर्यालको आइतबार बिहान निधन भएको हो । 

परिवारजनका अनुसार अर्याल एक महिनादेखि जण्डिस रोगबाट पीडित थिए । स्वास्थ्यमा समस्या देखिएपछि उनको दुई सातासम्म अस्पतालमा उपचार गरिएको थियो । चिकित्सकले थप उपचार सम्भव नरहेको जानकारी दिएपछि गत आइतबार आफन्तले उनलाई घर फर्काएका थिए । 

घरमै उपचार र हेरचाहका क्रममा आइतबार बिहान उनको निधन भएको हो । अर्याल दुई दशकदेखि क्रिकेट अम्पायरको भूमिकामा सक्रिय रहँदै आएका थिए । उनले स्थानीयदेखि विभिन्न प्रतियोगितामा अम्पायरिङ गर्दै क्रिकेट खेलको विकास र व्यवस्थापनमा महत्वपूर्ण योगदान पुर्‍याएका थिए । 

उनी क्रिकेटका लेभल–वान अम्पायर थिए । क्रिकेटप्रतिको उनको लगाव र निरन्तर सक्रियताका कारण उनी खेलकर्मीमाझ परिचित थिए । क्रिकेट क्षेत्रसागै पत्रकारिता र प्रकाशन क्षेत्रमा पनि उनको अनुभव थियो । उनले करिब एक दशकसम्म कान्तिपुर पब्लिकेसन्सको विराटनगरस्थित छापाखानामा प्रेस सहयोगीका रूपमा काम गरेका थिए । अर्यालको परिवारमा श्रीमती, एक छोरा र एक छोरी रहेका छन् ।