काठमाडौँ — दक्षिण कोरियाको इन्चोनमा मे १६ देखि २६ सम्म हुने याङ यङ जा टेबलटेनिस मिसन (वाईटीटीए) अन्तर्राष्ट्रिय प्रशिक्षण शिविरमा भाग लिन ६ सदस्यीय नेपाली टोली शनिबार दक्षिण कोरियाको इन्चोन गएको छ ।

प्रशिक्षण शिविरपछि उनीहरू २७ मेमा हुने अन्तर्राष्ट्रिय क्रिस्टियन टेबलटेनिस प्रतियोगितामा सहभागिता जनाउने छन् ।

प्रशिक्षण शिविर र प्रतियोगितामा सहभागी हुने खेलाडीमा यू–१३ मा रिभानमुनि बज्राचार्य र प्राज्ञा महर्जन, यू–१६ मा रिजन शाक्य र सुरम्या शाक्य तथा यू–१९ मा हिमाल बिष्ट र योङ्गी पौडेल छन् । टोली व्यवस्थापकमा हान्न को रहेको अखिल नेपाल टेबलटेनिस संघका कोषाध्यक्ष ज्याकी महर्जनले जनाएका छन् ।

यस प्रशिक्षण शिविरका लागि खेलाडी छनोट गत ५ अक्टोबरमा नेपाल एपीएम क्लबमा भएको थियो । प्रतियोगितामा यू–१३, यू–१६ र यू–१९ उमेर समूहका छात्र तथा छात्रा गरी ६ विधामा प्रतिस्पर्धा भएको थियो । प्रत्येक विधाका विजेता खेलाडीलाई दक्षिण कोरियाको प्रशिक्षण शिविरका लागि छनोट गरिएको कोषाध्यक्ष महर्जनले जानकारी दिए ।