नेपालगन्ज — बाँकेको कोहलपुरमा सञ्चालन भइरहेको चौथो कोहलपुर गोल्डकप फुटबल प्रतियोगिताको दोस्रो खेलमा जस्ट जोन एफसी (नाइजेरिया) विजयी भएको छ ।

वैशाख १९ बाट सुरु भएको प्रतियोगिताको दोस्रो दिनको खेलमा रोयल फुटबल क्लब (कर्णाली) लाई ४–२ गोल अन्तरले हराउँदै जस्ट जोन एफसी (नाइजेरिया) विजयी भएको हो ।

वैशाख २० गते कोहलपुर–२ स्थित कोहलपुर फुटबल रंगशालामा दुई टोलीबीच खेल भइरहेका बेला खराब मौषमका कारण ३७ औं मिनेटमा स्थगित भएको थियो । वर्षाले स्थगित खेलमा नाइजेरिया १–० गोलले अघि थियो । २९ औं मिनेटमा जस्ट जोनका जर्सी नम्बर ९ का हम्जात डिमोलाले गोल गरेका थिए । सोमबार बिहान भएको खेलमा ४–२ गोल अन्तरले जस्ट जोनले जित हासिल गरेको हो । 

जस्ट जोनलाई जिताउन दोस्रो हाफको ४७ औं मिनेटमा जर्सी नम्बर १० अब्दुल्लाजीजले गोल गर्दै २–० गोलको अग्रता दिलाए । ४९औं मिनेटमा रोयल फुटबल क्लब कर्णालीका जर्सी नम्बर ७ का सन्दिप देउवाले जवाफी गोल फर्काए । लगत्तै ५२औं मिनेटमा नाइजेरियाका जर्सी नम्बर २९ का ओवालाही अफिजले गोल अन्तर ३–१ मा पुर्‍याए । 

५५औं मिनेटमा गोल गर्दै कर्णालीका जर्सी नम्बर ७७ का विक्रम ओलीले गरेपछि  गोल अन्तर ३–२ बन्यो । खेलको अन्तिमतिर ९० मिनेटमा गोल गर्दै नाइजेरियाका जर्सी नम्बर २७ का ताजुदिन एडीले जित सुनिश्चित गराए । 
खेलको म्यान अफ द म्याच बनेका जस्ट जोन एफसीका हम्जात डिमोलाले नगद् ५ हजार रुपैयाँ प्राप्त गरे । म्यान अफ द म्याच लुम्बिनी खेलकुद परिषद् सदस्य जनक केसी, कोहलपुर डेन्टल हस्पिटलका प्रबन्धक गजेन्द्र शाही र कोहलपुर गोल्डकपका अतिथि सत्कार संयोजक प्रकाश खड्काले संयुक्त रुपमा वितरण गरेका थिए ।