सहिद स्मृति रंगशालामा आइतबार भएको खेलमा बागमतीले साविक विजेता चर्च ब्वाइज युनाइटेड ललितपुरलाई २–१ गोलले पराजित गरेको हो ।
हेटौंडा — मकवानपुरको बागमती गाउँपालिकामा जारी बागमती गोल्डकपमा सर्लाहीको बागमती युथ क्लबले जितेको छ ।
सहिद स्मृति रंगशालामा आइतबार भएको खेलमा बागमतीले साविक विजेता चर्च ब्वाइज युनाइटेड ललितपुरलाई २–१ गोलले पराजित गरेको हो । चर्च ब्वाइजका लागि सुशन मगरले ११ औं मिनेटमा गोल गर्दै टोलीलाई अग्रता दिलाएका थिए । बागमतीका लागि अनिष महर्जनले खेलको २८ मिनेटमा र कप्तान आयुष मगरले ८८ औं मिनेटमा पेनाल्टीमार्फत गोल गरे ।
प्लेयर अफ दि म्याच बागमतीका लागि पहिलो गोल गर्ने महर्जन घोषित भए । उनले १० हजार रुपैयाँ प्राप्त गरे ।
बागमती युथले अब सेमिफाइनलमा फ्रेन्डस क्लब ललितपुर र प्लानिङ ब्वाइज युनाइटेड काठमाडौंबीचको विजेतासँग खेल्ने छ । प्रतियोगितामा सेमिफाइनल खेल २३ गते र २४ गते हुनेछ । फाइनल खेल वैशाख २६ मा हुनेछ ।
प्रतियोगिताको विजेताले १० लाख र उपविजेताले ५ लाख रुपैयाँ पाउनेछन् । सर्वोत्कृष्ट खेलाडीले १ लाख १ हजार रुपैयाँ र विधागत उत्कृष्टहरुले २५–२५ हजार रुपैयाँ हात पार्ने छन् ।
