लुम्बिनी — २५७० औं बुद्ध जयन्तीको उपलक्ष्यमा खेलका माध्यमबाट आध्यात्मिक पर्यटनको विकास गर्ने उद्देश्यले आयोजित लुम्बिनी पिस मेडिटेसन म्याराथनको उपाधि कुलबहादुर बस्नेतले जितेका छन् । 

२१ किमी लामो दुरीको म्याराथन उनले १ घण्टा १४ मिनेट ७ सेकेन्डमा पूरा गरेर उपाधि जितेका हुन् । त्यस्तै, प्रकाशसिंह ऐरले १ घण्टा १७ मिनेट ५० सेकेन्डमा उक्त दुरी पार गरेर दोस्रो भए । त्यस्तै, सुनिल थापा मगरले १ घण्टा ३२ मिनेट ३० सेकेन्डमा उक्त दुरी पार गरेर तेस्रो भए । 

प्रथम, द्वितीय र तृतीय भएकालाई क्रमशः २१ हजार, १४ हजार र ७ हजार नगद तथा मेडल र प्रमाण पत्र प्रदान गरिएको थियो । नगद पुरस्कार, प्रमाणपत्र र मेडल लुम्बिनी विकास कोषका सद्भावनादूत तथा नेपालका लागि ग्रिसका अवैतनिक राजदूत विक्रम पाँडेकाजीले वितरण गरेका थिए । 

अर्को ७ किमी लामो क्याटोगरीको म्याराथनको उपाधि सन्तोषनाथ योगीले जितेका छन् । उनले उक्त दुरी २३ मिनेट ३८ सकेन्डमा पार गरेका थिए । त्यस्तै, शिवशंकर थारुले उक्त दुरी २७ मिनेट ४३ सकेन्डमा पूरा गरेर द्वितीय भएका छन् । त्यस्तै, बलबहादुर राईले उक्त दुरी २९ मिनेट १९ सकेन्डमा पूरा गरेर तृतीय भएका छन् । प्रथम, द्वितीय र तृतीय भएकालाई क्रमशः १४ हजार, ७ हजार र ५ हजार नगद तथा मेडल र प्रमाणपत्र प्रदान गरिएको थियो । नगद पुरस्कार, प्रमाणपत्र र मेडल गीतकार श्रीपुरुष ढकालले वितरण गरेका थिए ।