हाइनान — चीनको सान्या सहरमा बुधबारदेखि छैटौँ बिच गेम्स औपचारिक रूपमा सुरू हुँदैछ ।  करिब १० वर्षको अन्तरालमा पुनः हुन लागेको यो खेलकुद २००८ मा पहिलो पटक इन्डोनेसियाको बालीमा आयोजना गरिएको थियो ।

अन्तिम पटक २०१६ मा भियतनामको दा नाङमा खेलिएको थियो । चिनियाँ समयअनुसार बुधबार राति ८ बजे हाइनान प्रान्तको सान्यास्थित बिच खेलकुद परिसरमा एउटा भव्य समारोहबीच औपचारिक उद्घाटन गरिने कार्यक्रम छ । 

सन् २०१६ मा पाँचौँ संस्करण पूरा गरेको यो खेलकुद कोरोना महामारीलगायत विभिन्न अन्तर्राष्ट्रिय परिस्थितिका कारण एक दशकसम्म निस्क्रिय रहेको थियो ।

चीनले दोस्रो पटक यो खेलकुद इभेन्ट आयोजना गरेर यसलाई पुनः जागृत गराएको हो । पहिलो पटक सन् २०१२ मा शान्तोङमा गरेको थियो ।  बिच खेलकुदमा नेपालले २ वटा प्रतियोगितामा सहभागिता जनाउँदै छ । महिला कबड्डी टोली र दुइ कुस्ती खेलाडी प्रतियोगितामा भाग लिन सोमबार राती सान्या आइपुगेका छन्।