जुम्ला — यही वैशाख ३० गते रारा ट्रेल रन आयोजना हुने भएको छ । हरेक वर्ष नेपाली सेनाले आयोजना गर्दै आएको रारा ट्रेल रन वैशाख ३० मा हुन लागेको हो ।  

सेनाले वैशाख ३० गते बिहान १० बजेदेखि ट्रेल रन सुरु हुने जनाएको छ । सेनाको हनुमान ध्वज गुल्मका सेनानी खड्गबहादुर श्रेष्ठले भने, ‘यो प्रतियोगितामा धेरैभन्दा धेरै खेलाडीहरु सहभागी गराउने लक्ष्य छ ।’

खेल क्षेत्रमा युवायुवतीको आकर्षण बढाउन, कर्णाली खेल पर्यटनका हिसाबले पनि संभावनायुक्त क्षेत्र भएकोले चिनाउन र खेलाडीहरुको प्रतिभा पहिचानका लागि प्रतियोगिता हरेक वर्ष भइरहेको छ । 

यो रारा ट्रेल रनले नागरिक सैनिक सम्बन्धलाई बलियो बनाउँदै लैजाने उनको भनाइ छ । रारा ट्रेल रन १६ किलोमिटरको दुरीमा हुनेछ । १८ वर्षदेखि ४५ वर्ष उमेर समूहका ५० जना महिला र २ सय जना पुरुषहरुले भाग लिनेछन् । यो सँगै १० वर्षदेखि ६० वर्ष उमेर समूहका लागि ५ किलोमिटर रन फर फनसमेत हुनेछ ।