(काठमाडौं) र  (पर्सा) — प्रधानमन्त्री कप पुरुष राष्ट्रिय क्रिकेट प्रतियोगिताको शुक्रबार हुने फाइनल खेल्ने क्रममा त्रिभुवन आर्मी क्लब र सुदूरपश्चिम प्रदेशबीच ठूलो भिन्नता छ । प्रतियोगिताको यो आठौं संस्करण हो । 

आर्मीले सबै संस्करणको फाइनल खेल्दै आएको छ । त्यसको ठिक विपरीत सुदूरपश्चिम पहिलो पटक फाइनल खेल्दै छ । विभागीय टोलीको वर्चस्व रहेको पीएम कप क्रिकेटको इतिहासमै कुनै प्रदेश टोलीले फाइनल खेल्न लागेको पहिलो पटक हो । यो इतिहास सुदूरपश्चिमले बनाएको छ । वीरगन्जस्थित टीबी शाह क्रिकेट मैदानमा उपाधि जितेमा सुदूरले अर्को इतिहास लेख्ने छ । 

तीन दिनअघि सुदूरपश्चिमले साविक विजेता नेपाल पुलिस क्लबलाई पराजित गरी फाइनलमा स्थान पक्का गरेको थियो । राउन्ड रोबिन लिगमा सुदूरपश्चिमले ९ मध्य ६ खेल जित्यो भने तीनमा पराजय भोगेको थियो । लिगमा आर्मीले सुदूरपश्चिमलाई १ सय ५० रनमा अलआउट गर्दै ७ विकेटले सजिलै जित हात पारेको थियो । सुदूरपश्चिमविरुद्धको खेल आर्मीले सधैं जित्दै आएको छ । 

तीव्र गतिका बलर हेमन्त धामी र कप्तान शेर मल्ल सुदूरपश्चिमलाई फाइनल पुर्‍याउने प्रमुख दुई खेलाडी हुन् । हेमन्त र बागमती प्रदेशका कप्तान सन्दीप लामिछानेले सर्वाधिक २५ विकेट लिएका छन् भने उनीहरूलाई २२ विकेट लिएर शेरले पछ्याइरहेका छन् । त्यसपछि सुदूरपश्चिमबाट सर्वाधिक विकेट लिने खेलाडी सूचीमा अशोक धामी छन् । उनको ९ विकेट छ । 

पीएम कपको इतिहासमा सुदूरपश्चिम यसअघि कमजोर टोली रहँदै आएको थियो । सन् २०१७ मा प्रतियोगिताको पहिलो संस्करणमा सहभागीलाई दुई समूहमा विभाजन गरेर खेलाइँदा सुदूरपश्चिमले ३ खेल खेलेको थियो । कुनै खेल जित्न सकेको थिएन, त्यसमा २ खेलमा हार भोगेको थियो भने १ खेल रद्द भएको थियो । २०१८ मा ४ मध्ये २ खेल जित्नुका साथै १ हार र १ खेल रद्द भएपछि टोली लुम्बिनी प्रदेशसँग नेट रनरेटमा पछाडि परेर सेमिफाइनल पुग्न असफल भएको थियो ।

सन् २०१९ मा सुदूरपश्चिमले ४ मध्ये १ खेलमात्र जितेको थियो भने २ मा पराजय भोगेको थियो । सन् २०२१ मा ४ मध्ये १ खेलमात्र जितेको थियो भने ३ मा पराजय भोग्यो । २०२२ मा पनि सुदूरले ४ मध्ये १ खेलमात्र जितेको हो । सन् २०२४ देखि प्रतियोगिता राउन्ड रोबिन लिगका आधारमा खेलाउन थालियो । त्यसमा सुदूरपश्चिमले ९ खेलमा ४ जित र ५ हार तथा सन् २०२५ मा तीन खेल जित्नुका साथै ६ मा हार भोगेको थियो । 

सबै संस्करणको फाइनल खेल्दै आए पनि आर्मी दुई पटकमात्र विजेता बनेको छ । सन् २०१७ को फाइनलमा टोली नेपाल पुलिस क्लबसँग संयुक्त विजेता बनेको थियो । सन् २०२१ मा नेपाल एपीएफ क्लबलाई पराजित गरी पहिलो पटक आर्मी स्पष्ट विजेता बन्यो । यसपालि सुदूरपश्चिमलाई पराजित गरेमा पुलिसले सर्वाधिक ४ पटक जितेको उपाधि कीर्तिमान नजिक आर्मी पुग्नेछ । 

आर्मीमा सुदूरपश्चिमकै खेलाडीको वर्चस्व छ । कप्तान विनोद भण्डारीसहित भीम सार्की, अर्जुन साउद, नरेन साउद र आकाश चन्द सुदूरपश्चिमकै खेलाडी हुन् । लिग चरणमा आर्मीले खेलेका ९ मध्ये ८ खेलमा जित निकाल्दा एक खेल अनिर्णीत रह्यो । अपराजित आर्मी १७ अंकसहित अंकतालिकाको शीर्षस्थानमा रहेर फाइनल पुगेको थियो । सन्तुलित ब्याटिङ र अनुशासित बलिङका कारण आर्मी प्रतियोगिताभर प्रभावशाली देखिएको छ । विनोदको नेतृत्वमा रहेको टोलीमा अनुभवी खेलाडीको उपस्थिति बलियो पक्षका रूपमा देखिएको छ । कुशल मल्ल र शाहब आलम जस्ता खेलाडी उत्कृष्ट लयमा रहँदा आर्मी फाइनलमा दाबेदार टोली भएर उभिएको छ । 

सुदूरका कप्तान शेरले पनि आफ्नो टिमलाई सन्तुलित रूपमा अघि बढाएका छन् । पछिल्लो समय टोलीका बलरहरूले उत्कृष्ट प्रदर्शन गर्दै आएका छन्, जसले फाइनललाई प्रतिस्पर्धात्मक बनाउने अपेक्षा गरिएको छ । पुलिस भने यसपल्ट फाइनलमा पुग्न असफल रह्यो । ९ अंकसहित तालिकाको पाँचौं स्थानमा सीमित पुलिसको प्रदर्शन यस संस्करणमा अपेक्षाकृत कमजोर रह्यो । अघिल्ला दुई संस्करणमा लगातार उपाधि जितेको पुलिस यसपालि लय कायम राख्न असफल भयो । फाइनलमा अनुभवी र अन्तर्राष्ट्रिय खेलाडीको उपस्थिति निर्णायक बन्न सक्ने देखिएको छ । आर्मीका कप्तान विनोदसँगै कुशल र शाहबले टोलीलाई मजबुत बनाएका छन् भने सुदूरपश्चिममा कप्तान शेर र हेमन्त धामी जस्ता खेलाडी उत्कृष्ट लयमा छन् ।