संघ र स्थानीय सरकारको संयुक्त लगानीमा रंगशाला निर्माणको काम सुरू भएको हो ।
सिरहा — सिरहाको लहान नगरपालिका-४ स्थित यज्ञभूमिमा क्रिकेट रंगशाला निर्माणको काम अघि बढेको छ । संघ र स्थानीय सरकारको संयुक्त लगानीमा रंगशाला निर्माणको काम सुरू भएको हो ।
रंगशाला निर्माणका लागि नगर प्रमुख महेश प्रसाद चौधरीले बिहीबार औपचारिक रूपमा शिलान्यास गरे । रंगशाला निर्माणका लागि कुल आठ करोड २३ लाख रुपैयाँको लागत अनुमान गरिएकोमा सञ्जय जेसी तनिष्का जेभी निर्माण कम्पनीले ५ करोड ६२ लाखमा ठेक्का लिएको छ ।
यसका लागि नगरपालिकाले ५ करोड तथा संघ सरकारले ३ करोड रुपैयाँ विनियोजन गरेको थियो । नगरपालिका र निर्माण कम्पनीबीच भएको ठेक्का सम्झौताअनुसार यो रंगशाला २०८३ चैतभित्रै निर्माण भइसक्नुपर्नेछ ।
यो क्रिकेट रंगशाला निर्माण भएसँगै यहाँका प्रतिभाहरू मूलधारमा आउने र लहान खेलकुदको हब बन्ने विश्वास नगर प्रमुख चौधरीले व्यक्त गरे । यसले स्थानीय अर्थतन्त्र र पर्यटनमा पनि सकारात्मक प्रभाव पार्ने उनले बताए ।
