काठमाडौँ — एनसेल बाह्रखरी गल्फ प्रतियोगिताको नवौं संस्करण यही १९ वैशाख गोकर्ण गल्फ कोर्समा हुने भएको छ ।

हरेक वर्ष आयोजना गर्दै आएको प्रतियोगितामा १ सयभन्दा बढी गल्फरको सहभागिता रहने बिहीबार बाह्रखरी मिडियाले पत्रकार सम्मेलनमार्फत जनाएको छ । कर्पोरेट क्षेत्रका व्यक्तित्वहरूको सहभागिता रहने प्रतियोगिताको विजेताले २४ क्यारेट सुनबाट बनेको बल पुरस्कार प्राप्त गर्नेछन् ।

त्यस्तै अन्य विभिन्न विधाका विजेताले गिफ्ट ह्याम्पर तथा ट्रफी प्राप्त गर्नेछन् । खेल १८ होलमा स्टेबल फोर फरम्याटमा हुनेछ । प्रतियोगितामा होल इन वन विजेताले बीवाईडीको एट्टो थ्री गाडी जित्नेछन् ।  

सोही अवसरमा इकोनोमिक सिम्पोजियम पनि हुने भएको छ । विश्वव्यापी पछिल्ला दिनमा देखा परेको आर्थिक उतारचढाव, नेपालजस्ता मुलुकलाई पार्ने असरका बारेमा इकोनोमिक सिम्पोजियममा विचारमन्थन हुने बाह्रखरी मिडियाका अध्यक्ष प्रतीक प्रधानले जानकारी गराए ।

उनले प्रतिष्ठित व्यावसायिक र आर्थिक क्षेत्रका अग्रणी व्यक्तित्वलाई गल्फ खेलमा प्रतिस्पर्धा गराउने, मुलुकको आर्थिक अवस्थामाथि परिसंवाद गरी सरकारलाई नीति निर्माण र निर्णय प्रक्रियामा सहज तुल्याउने उद्देश्यले आर्थिक सिम्पाजियम गरिएको बताए ।  

अर्थमन्त्री डा. स्वर्णिम वाग्लेको आतिथ्यतामा हुने इकोनोमिक सिम्पोजियममा भारतीय नीति आयोगका पूर्व सीईओ अमिताभ कान्त, पूर्वअर्थमन्त्री रामेश्वर खनालले कार्यपत्र प्रस्तुत गर्नेछन् ।

प्रतियोगितामा विगतमा जस्तै यस वर्ष पनि विदेशी खेलाडीको सहभागिता रहने जनाइएको छ । नेपालस्थित विदेशी नियोगका प्रतिनिधिको प्रतियोगितामा सहभागी हुनेछ ।

नेपाल गल्फ संघका सचिव तथा प्रतियोगिताका निर्देशक दीपक आचार्यले गल्फ प्रतियोगिताबारे प्राविधिक पक्षबारे जानकारी गराउँदै नेपालमा गल्फ टुरिजमको सम्भावना उच्च रहेको बताए । उनले भने, ‘नेपालको हावापानी गल्फ टुरिजमका लागि एकदमै अनुकूल छ । यस इकोनोमिक सिम्पोजियममार्फत् गल्फ टुरिजमको विषयलाई उठान गर्नुहोला ।’