पाँचथर — पाँचथरको फालेलुङ गाउँपालिका-४ चाररातेमा आयोजित साहसिक फुटबल प्रतियोगिताको उपाधि सूर्योदय फुटबल क्लब लाफेले जितेको छ ।

समुद्री सतहदेखि ३ हजार ४ सय ५० मिटरको उचाइमा आयोजित प्रतियोगितामा प्रतिस्पर्धी तीन सिमाना जनसेवा समाजलाई हराँउदै उपाधि जित्न सफल भएको हो ।

विजेता सूर्योदयले ४० हजार मूल्यबराबरको चौंरीको ४० किलो घिउसहित ट्रफी, मेडल र प्रमाणपत्र प्राप्त गर्‍यो । त्यस्तै उपविजेता तीन सिमाना जनसेवा समाजले २० हजार मूल्यबराबरको २० किलो घिउमा चित्त बुझायो ।

साहसिक फुटबल प्रतियोगिता नवौं फालेलुङ चौंरी पर्यटन महोत्सवका अवसरमा कञ्चनजंघा याक चिज उत्पादन समूहले आयोजना गरेको हो ।

२०७४ सालदेखि नेपाली नयाँ वर्षमा चौंरी पर्यटन महोत्सव आयोजना गरिन्छ । सोही अवसरमा साहसिक फुटबल प्रतियोगिता आयोजना गरिएको हो ।