पर्सा — गृहनगर वीरगन्जमा सोमबार आसिफ शेखले प्रधानमन्त्री कपको इतिहासमै पहिलो दोहोरो शतक बनाउँदा विभागीय टोली एपीएफले मधेश प्रदेशलाई ७४ रनको फराकिलो अन्तरले पराजित गरेको छ । 

एपीएफका लागि आसिफ शेखले विस्फोटक ब्याटिङ गर्दै १ सय ४२ बलमा २ सय ८ रनको शानदार दोहोरो शतक प्रहार गरे। उनले आफ्नो इनिङ्समा १७ छक्का र १५ चौका प्रहार गरेका थिए। उनी रिटार्यड भए ।

मैदानमा दुवै टिमले कीर्तिमानी वीरगन्जस्थित टीबी शाह क्रिकेट मैदानमा सोमबार रनको वर्षा गरेका थिए । दुबै टोलीले सोमबार ठूलो स्कोर बनाउँदा मैदानमा कूल ७ सय ६ रन बनेको थियो । टस जितेर पहिले फिल्डिङ रोजेको मधेशविरुद्ध एपीएफले निर्धारित ५० ओभरमा ५ विकेट गुमाउँदै ३ सय ९० रनको विशाल योगफल खडा गरेको थियो। प्रधानमन्त्री कपको इतिहासमा यो हालसम्मकै सर्वाधिक योगफल पनि हो । एपीएफका सन्दीप जोराले ४२ बलमा ५६ रन जोड्दा रोहित पौडेलले ७३ बलमा ५५ रन बनाए।