(जनकपुर) र (पर्सा) — बसिर अहमदको ५ विकेट र कप्तान विनोद भण्डारीको आक्रमक शतकमा त्रिभुवन आर्मी क्लबले प्रधानमन्त्री कप कप पुरुष राष्ट्रिय क्रिकेट प्रतियोगितामा बिहीबार सुदूरपश्चिम प्रदेशलाई ७ विकेटले पराजित गरेको छ । 

जितपछि आर्मीले फाइनलमा पुग्ने सम्भावना बलियो बनाएको छ । एकमात्र अपराजित टोली आर्मीको ७ खेलबाट १३ र सुदूरपश्चिमको ८ खेलबाट १० अंक छ । आर्मी र सुदूरपश्चिम नै शीर्ष दुई स्थानमा छन् । सहभागी १० टोलीले राउन्ड रोबिनमा प्रतिस्पर्धा गरेपछि शीर्ष दुई टोलीले फाइनल खेल्ने प्रावधान छ । 

बसिरले ५ विकेट लिएपछि टस जितेको सुदूरपश्चिम जनकपुरस्थित प्रस्तावित रामजानकी बहुउद्देश्यीय अन्तर्राष्ट्रिय रंगशालाको क्रिकेट मैदानमा ३८.१ ओभरमा १ सय ५० रनमा अलआउट भयो । सुदूरपश्चिमका ओपनिङ ब्याटर खड्ग बोहरा र अभिषेक पाल क्रमशः १३ र २४ रनमा आउट भए । प्रकाश पाण्डे ८, नरेश भट्ट ३, दीपक बोहरा ७, अशोक धामी ११, भीम बोहरा ३ रनमा आउट भए । 

९८ रनमा ८ विकेट गुमाएको अवस्थामा नारायण जोशीले ६४ बलमा ६३ रन बनाए । उनले ३ चौका र ५ छक्का प्रहार गरे । विकास आग्रीले ९ रन बनाए । बसिरले ९.१ ओभरमा ३५ रन खर्चिदै सर्वाधिक ५ विकेट लिए । शाहब आलमले २९ र नरेन साउदले २८ रन दिएर २–२ तथा आकाश चन्दले १ विकेट लिए । 

विनोदले ७५ बलमै १ सय रन बनाएपछि आर्मीले २०.२ ओभरमा नै ३ विकेट क्षतिमा १ सय ५५ रन बनायो । प्लेयर अफ द म्याच विनोदले १२ चौका र ५ छक्का प्रहार गरे । आर्मीलाई विजयनिम्ति ८ रन आवश्यक हुँदा उनी २० औं ओभरमा आउट भए । त्यसपछि कुशल मल्लले आग्रीलाई लगातार दुई छक्का प्रहार गर्दै आर्मीलाई विजयी बनाए । कुशलले १८ बलमा समान २ चौका र छक्कासहित अविजित २६ रन बनाए । तृतराज दास ५ रन, भीम सार्की २५ बलमा १६ रन बनाई आउट भएका थिए । सुदूरपश्चिमका शेर मल्लले ७ ओभरमा ५२ रन दिएर २ र मिलन बोहराले १ विकेट लिए । 

पुलिसको प्रभावशाली प्रदर्शन 

वीरगन्जस्थित टीबी शाह क्रिकेट मैदानमा भएको प्रधानमन्त्री कपकै अर्का खेलमा नेपाल पुलिस क्लबले कर्णाली प्रदेशमाथि ४८ रनको प्रभावशाली जित निकालेको छ । 

पुलिसले उत्कृष्ट प्रदर्शन गर्दै महत्त्वपूर्ण अंक हासिल गरेको छ । टस जितेर ब्याटिङ रोजेको पुलिसले निर्धारित ५० ओभरमा ८ विकेट गुमाएर २ सय ६१ रनको योगफल खडा गर्‍यो । सुरुमा केही दबाबपूर्ण भए पनि मध्यक्रमले इनिङ्स सम्हालेको थियो । ओपनर दिनेश खरेलले धैर्यपूर्ण ब्याटिङ गर्दै १०० बलमा ८२ रन बनाए । उनले इनिङ्सलाई स्थिर बनाएर टोलीलाई ठूलो स्कोरतर्फ डोर्‍याए । उनलाई साथ दिँदै अमित श्रेष्ठले ३२ बलमा ३० रनको उपयोगी इनिङ्स खेले । अन्य ब्याटरले स–साना साझेदारी गर्दै स्कोर प्रतिस्पर्धात्मक बनाए ।