फाप्ला अन्तर्राष्ट्रिय क्रिकेट मैदान तथा खेलग्राम पूर्वाधार निर्माण विकास समितिका अध्यक्ष सुवाश शाहीले रंगशालाको हालसम्मको प्रगति विवरण मन्त्री पोखरेलसमक्ष प्रस्तुत गरेका थिए । उनले मैदान निर्माणका प्रारम्भिक तयारीका सम्पूर्ण काम सम्पन्न भइसकेको जानकारी दिए । ‘जग्गा प्राप्ति भइसकेको छ, डीपीआर तयार भइसकेको छ र वातावरणीय प्रभाव मूल्यांकन (ईआईए) पनि स्वीकृत भइसकेको छ,’ अध्यक्ष शाहीले भने, ‘हालै यो परियोजना राष्ट्रिय योजना आयोगको ‘प्रोजेक्ट बैंक’मा समेत समावेश भइसकेको छ ।’

सरकार सकारात्मक देखिएकाले बजेटको स्रोत सुनिश्चित भएलगत्तै निर्माण कार्य अघि बढ्ने उनले बताए । ‘यो परियोजनाको बजेट आकार ठूलो भएकाले खेलकुद मन्त्रालय मात्र नभई भौतिक पूर्वाधार मन्त्रालय, पर्यटन मन्त्रालय र प्रधानमन्त्री कार्यालयबाट समेत विशेष चासोका साथ अघि बढाउने विषयमा सकारात्मक संकेत देखिएको छ,’ उनले भने । अध्यक्ष शाहीले आगामी आर्थिक वर्षभित्र निर्माणका लागि टेन्डर आहृवान गर्ने विषयमा समेत छलफल भइरहेको जानकारी दिए ।