न्यू स्टार क्लबको आयोजनामा सुरु भएको प्रतियोगिताको उद्घाटन खेलमा झापा ११ फुटबल क्लबलाई २–१ गोल अन्तरले पराजित गर्दै मोरङको पथरी स्पोर्टिङले सेमिफाइनलमा स्थान सुरक्षित गरेको छ ।
सुनसरी — पथरी स्पोर्टिङ क्लबले सुनसरीको बराहक्षेत्रमा सोमबारबाट सुरु नवौं संस्करणको अन्तराष्ट्रिय आमन्त्रण भरौल गोल्डकपमा विजयी सुरुवात गरेको छ ।
न्यू स्टार क्लबको आयोजनामा सुरु भएको प्रतियोगिताको उद्घाटन खेलमा झापा ११ फुटबल क्लबलाई २–१ गोल अन्तरले पराजित गर्दै मोरङको पथरी स्पोर्टिङले सेमिफाइनलमा स्थान सुरक्षित गरेको छ ।
स्थानीय जडेज खेलमैदान भरौलमा भएको प्रतिष्पर्धामा पथरीको जितमा सञ्जय लिम्बु र आदित्य शाक्यले एक–एक गोल गरे । पहिलो हाफको पूरै समय झापाली टिमलाई दबावमा राखेको पथरीको लागि सञ्जयले २६ औं मिनेटमा गोल गरे ।
पहिलो हाफमा १–० ले पछि परेको झापाले दोस्रो हाफको १० मिनेटमा गोल फर्कायो । राजेश दाहालको पासमा घनश्याम कार्कीले आकर्षक हेड गोल गरेपछि खेल बराबरीमा आएको थियो । तर दोस्रो हाफको ३१ औं मिनेटमा मिलन राईको पासमा आदित्यले गोल गरेपछि पथरीले २–१ गोल अन्तरको स्पष्ट जित हात पारेको हो ।
आदित्य खेलको म्यान अफ द म्याच घोषित हुँदै नगद ५ हजार हात पार्न सफल भए । प्रतियोगिता अन्तर्गत मंगलबारको दोस्रो क्वाटरफाइनल खेल पाहुना टोली मलेसियाको आरटी एफसी र इटहरीको योङ ब्रदर्श क्लबबीच प्रतिष्पर्धा हुने आयोजकले जनाएको छ ।
चैत्र २९ सम्म चल्ने प्रतियोगितामा दुई विदेशी क्लबसहित ८ टिम सहभागी छन् । प्रतियोगिताको विजेताले ४ लाख र उपविजेताले २ लाख रुपैयाँ प्राप्त गर्नेछन् । प्रतियोगितामा उत्कृट खेलाडीले २५ हजार र बिधागत तर्फका उत्कृष्ट खेलाडीलाई जनही १० हजार प्रदान गरिने आयोजकले जनाएको छ ।
