काठमाडौँ — नेपाल कबड्डी लिग (एनकेएल) मा स्वदेशी तथा विदेशी खेलाडीको रोमाञ्चक प्रतिस्पर्धासँगै र्‍यापरहरूको सिर्जना पनि देख्न–सुन्न पाइने भएको छ । त्यसका लागि एनकेएलको ‘रियालिटी शो पार्टनर’ बनेको छ नेपहपको श्रीपेच ।

जेन्जी पुस्तामा निकै लोकप्रिय रियालिटी शो नेपहपको श्रीपेचसँग एनकेएल आयोजक एस्ट्रोनिक्स म्यानेजमेन्टले शुक्रबार साझेदारी गरेको हो । एस्ट्रोनिक्सका सीईओ विकास अग्रवाल र नेपहपको श्रीपेचका संस्थापक सुदीप पोखरेलले साझेदारी पत्रमा हस्ताक्षर गरेका छन् । एनकेएल सिजन २ र नेपलहपको श्रीपेच सिजन ३ को लागि सहकार्यमा सम्झौता भएको हो ।

सीईओ अग्रवालले एनकेएल र नेपहपको सहकार्यले नेपालमा एउटा नयाँ युगको सुरुआत गर्दै स्पोर्ट्स र इन्टरटेनमेन्टलाई हेर्ने तरिका नै परिवर्तन गर्ने बताए ।

नेपहपका पोखरेलले रियालिटी शो र कबड्डी लिगबीच पहिलोपल्ट सहकार्यको सम्झौता भएको बताउँदै र्‍यापरहरूले एनकेएलमा एक्सपोजर पाउने बताए । उनले कबड्डीसँगै हिपहप म्युजिकको सहयात्राको थालनी भएको सुनाए ।

एनकेएल सिजन दुई जेठ २२ देखि दशरथ रंगशालास्थित राखेप कभर्डहल हुनेछ । त्यसमा ६ सहरका ६ फ्रेन्चाइज टिमले प्रतिस्पर्धा गर्नेछन् । सम्झौता अनुसार नेपहपको श्रीपेचका र्‍यापरले प्रतिस्पर्धाको आधारमा एनकेएलका ६ टिमका लागि फरक एन्थम सिर्जना गर्नेछन् । प्रत्येक विजेताले ५० हजार पाउने छन् । नेपहपको श्रीपेचले शीर्ष ३० को छनोटपछि दुई एपिसोड एनकेएल थिममा तयार गर्नेछ ।

कार्यक्रममा नेपहपको श्रीपेचका निर्णायकद्वय भियोमा र मानस घले उपस्थित थिए । उनीहरूले र्‍याप र एनकेएलको सहकार्यले खेल र संगीत दुवैलाई फाइदा पुग्ने बताए ।