काठमाडौँ — दोलखा जिल्ला क्रिकेट संघले चैत २९ गतेदेखि गौरीशंकर सुपर लिग टी–२० क्रिकेट प्रतियोगिता गर्ने भएको छ । वैशाख ९ सम्म चल्ने प्रतियोगिता काठमाडौंको तल्लो मूलपानी क्रिकेट मैदानमा हुनेछ ।

प्रतियोगितामा १८ टिमको सहभागिता रहने गौरीशंकर क्रिकेट एकेडमीका अध्यक्ष विष्णुकुमार बुढाथोकीले बताए । आयोजकले मंगलबार प्रेसमिटमा युवा प्रतिभालाई आफ्ना खेल कौशलता प्रदर्शन गर्ने अवसर दिलाउनका लागि प्रतियोगिता गरिएको जनाएको छ ।

प्रतियोगिताको कुल बजेट ९ लाख रुपैयाँ रहेकामा विजेताले १ लाख र उपविजेताले ५० हजार रुपैयाँसहित ट्रफी प्राप्त गर्नेछन् । सर्वोत्कृष्ट खेलाडीले २० हजार रुपैयाँबराबरको क्रिकेट किट प्राप्त गर्नेछन् । प्रत्येक खेलको म्यान अफ द म्याचलाई ट्रफी दिइनेछ । शतक बनाएमा २ हजार १ सय र ६ विकेट लिएमा २ हजार १ सय प्रदान गरिनेछ ।