पाल्पा — पाल्पाको रामपुरमा फुटबल खेलमैदान स्तरोन्नति सुरु भएको छ । रामपुर नगरपालिका–७, किसानबारीस्थित ‘ज्योतिपुञ्ज खेल मैदान’ स्तरोन्नतिको ज्योतिपुञ्ज युवा क्लबका अध्यक्ष सुन्दर राना र रामपुर नगरपालिकाका प्रमुख रमणबहादुर थापाले शिलान्यास गरे । 

रामपुर नगरपालिकाबाट विनियोजित बजेटमार्फत खेल मैदान स्तरोन्नति सुरु भएको ज्योतिपुञ्ज युवा क्लबका अध्यक्ष रानाले बताए । रामपुर नगरपालिकाले चालु आर्थिक वर्षमा खेल मैदान स्तरोन्नतिका लागि बहुवर्षीय आयोजनाअन्तर्गत २ करोड विनियोजन गरेको छ । चालु आर्थिक वर्षमा ५० लाख बराबरको बजेट व्यवस्थापन भएको नगर प्रमुख थापाले बताए । पहिलो चरणमा स्तरोन्नति कार्यअन्तर्गत ५० लाख बराबरको काम हुने उनले बताए । 

किसानबारी खेल मैदानको स्तरोन्नतिका लागि ११ करोड ६२ लाखको विस्तृत परियोजना प्रतिवेदन (डीपीआर) तयार भएको छ । क्रमागत रूपमा आगामी वर्ष बजेट निरन्तर विनियोजन गर्दै जाने नगर प्रमुख थापाले बताए । किसानबारीमा फुटबल मैदानका साथै बुल्टार खेल मैदानलाई क्रिकेट हबका रूपमा विकास गर्ने योजना रहेको उनले बताए । किसानबारी फुटबल मैदानमा यस वर्ष पर्खालसहितको घेराबार निर्माण, खेलमैदान सम्याउने लगायतका काम हुने ज्योतिपुञ्ज युवा क्लबका अध्यक्ष रानाले बताए ।