भैरहवा — रुपन्देही सुपरलिग–२०८२ मंगलबारदेखि भैरहवामा हुने भएको छ । आयोजक संस्था रुपन्देही क्रिकेट संघले चैत १७ देखि ३० गतेसम्म ‘बी’ डिभिजनका खेलहरु संचालन हुने जानकारी दिएको हो । 

प्रतियोगिताका संयोजक प्रथम पराजुलीले रुपन्देही सुपरलिग–२०८२ मा कुल ३७ खेलमा रुपन्देहीका २० वटा क्लब तथा एकेडेमीहरु सहभागी हुने बताए । उनका अनुसार प्रधानमन्त्री कपको समापन पछि ‘ए’ डिभिजनका खेल सञ्चालन हुनेछन् । ‘बी’ डिभिजनका खेलपछि दुई टीम ‘ए’ डिभिजनमा बढुवा हुनेछन् । त्यसपछि ‘ए’ डिभिजनको टाइसिट प्रकाशन हुने छ । 

यो सुपरलिग २४औं संस्करण हो । प्रतियोगिताको विजेता टिमले नगद १ लाख १ र उपविजेताले ५० हजार १ रुपैयाँ प्राप्त गर्ने छ । सिद्धार्थ क्रिकेट मैदानमा हुने प्रतियोगिता सम्पन्न गर्न करिब १५ लाख रुपैयाँ खर्च लाग्ने जनाइएको छ । 

म्यान अफ द सिरिजले १५ हजार, बेष्ट ब्याटर, बेष्ट बलर र उदयीमान खेलाडीले समान पाँच–पाँच हजार रुपैयाँ प्राप्त गर्ने छन् । प्रत्येक खेलको म्यान अफ द म्याचले १ हजार २ सय रुपैयाँ पाउने छन् । 

प्रतियोगिताको विजेता पुरस्कार माउण्ट एभरेष्ट कत्था मिल, उपविजेता पुरस्कार विके ज्वेलर्स भैरहवा, म्यान अफ द म्याचको पुरस्कार सिद्धार्थ उद्योग वाणिज्य संघले प्रायोजन गरेका छन् ।

रुपन्देही क्रिकेट संघका पूर्वअध्यक्ष प्रशान्तविक्रम मल्लले सुपरलिग रुपन्देही क्रिकेटको मेरुदण्ड भएको जनाए । उनका अनुसार जिल्लाबाट राष्ट्रिय तथा अन्तर्राष्ट्रिय खेलाडी उत्पादनमा लिगले महत्वपूर्ण योगदान दिएको छ ।

प्रतियोगितामा ‘ए’ डिझिजनका वेष्टर्न क्रिकेट क्लब, न्यू होराजन त्रिकेट क्लब, लुम्बिनी खुकुरी क्लब, तिलोत्तमा क्रिकेट क्लब, जेआर क्रिकेट क्लब, तिरुपति क्रिकेट क्लब, एमसीसी त्रिकेट क्लब र बुटवल राइनोज सहभागी हुनेछन् ।