काठमाडौँ — हिमालयन जाभा नेसनल बास्केटबल लिग (एचजेनएबीएल) मा केभीसी हाउन्ड्सले विजय यात्रा राख्दै लगातार सातौं जित हात पारेको छ । हाउन्ड्सले त्रिपुरेश्वरस्थित दशरथ रंगशाला कभर्डहलमा आइतबार कीर्तिपुरलाई ७९–६९ ले पराजित गर्‍यो । 

हाउन्ड्सले २५–२१, १७–११, ११–१५, २६–२२ को प्रदर्शन गर्‍यो । १० खेलमा सातौं जितपछि १७ अंक जोडेको हाउन्ड्स चौथो स्थानमा छ । हाउन्ड्सका असिम श्रेष्ठ प्लेयर अफ दि म्याच भए । आठौं हार बेहोरेको कीर्तिपुरको १० खेलबाट १२ अंक छ ।

शनिबार राति गोल्डेनगेट बास्केटबल क्लबले सोलो बास्केटबल क्लबलाई १००–६० ले पराजित गर्दै नवौं जित हात पारेको थियो । गोल्डेनगेटले १० खेलबाट १९ अंक जोडेको छ । गोल्डेनगेटका जैन खान २४ स्कोर गर्दै प्लेयर अफ द म्याच भए ।