तल्लो मूलपानी मैदानमा एपीएफ र आर्मीबीचको खेल वर्षाका कारण २० ओभरमा छोट्याइएको थियो, जहाँ टस हारेपछि ब्याटिङमा आएको एपीएफले ९.५ ओभरमा ३ विकेट गुमाई ८५ रन बनायो । त्यसपछि पुनः वर्षा हुँदा खेल रोकिएको थियो । कप्तान रोहित पौडेल १७ बल खेल्दै २ चौका र १ छक्कासहित बनाएको २६ रनमा अविजित थिए । दीपक बोहरा १८, आसिफ शेख १३ बलमा १ छक्कासहित २१ र सन्दीप जोरा ७ बलमा १ छक्कासहित ११ रनमा आउट भएका थिए । आर्मीका कुशल मल्लले २ र बसिर अहमदले १ विकेट लिएका थिए ।

प्रतियोगितामा वर्षाका कारण खेल रोकिएको दोस्रो अवसर हो । जनकपुरमा मधेश र कोशी प्रदेशबीच टस पनि नभई खेल रद्द भएको थियो भने कर्णालीविरुद्धको खेलमा लुम्बिनी प्रदेशले ७ ओभरमा विनाक्षति २० रन बनाएको अवस्थामा खेल रोकिएको थियो । आइतबार मूलपानीको दुई मैदानमा एपीएफ र गण्डकी तथा बागमती र आर्मीबीच प्रतिस्पर्धा हुनेछ ।