धुलाबारी — अखिल नेपाल फुटबल संघ (एन्फा) का अध्यक्ष पंकजविक्रम नेम्वाङले राष्ट्रिय खेलकुद परिषद्ले आफ्नो संस्थानलाई गरेको तीन महिनाका निलम्बन फिर्ता लिन शुक्रबार माग गरेका छन् ।

चैत १३ का लागि तय चुनावी साधारण सभा स्थगित भएपछि एन्फाले त्यसको स्थानमा होटल मेची क्राउनमा भेलाको आयोजना गरेको थियो । त्यस अगाडि एन्फाको निर्वाचन कमिटीले राखेपको निलम्बनपछि चुनाव अर्को सूचना नआएसम्मका लागि स्थगित भएको जनाएको थियो ।

निर्वाचनकै लागि फिफा र एसियली फुटबल महासंघ (एएफपी) का लागि प्रतिनिधि नेपाल आएकोमा उनीहरूले नै चुनाव स्थगित गर्ने सल्लाह दिएपछि तय कार्यक्रम स्थगित भएको थियो । यी प्रतिनिधिले चुनावी कार्यक्रम स्थगित भएपछि नेपाल छाडिसकेका छन् । भेलामा अध्यक्ष नेम्वाङले भेलामा भने, ‘हाम्रो जिम्मेवारी देशको कानुन मान्ने पनि हो, हाम्रो जिम्मेवारी फिफाको विधान मान्ने पनि हो । प्रत्येक खेलको अन्तर्राष्ट्रिय सर्वोच्च निकायसँग मेल खाने कानुन बनाउनु पर्छ ।’

अध्यक्ष नेम्वाङले सरकारसँग द्वन्द्व बनाउने पक्षमा नरहेको बताए । उनले थपे, ‘अबको घटनाक्रम पछि बल सरकारको कोर्टमा गएको छ । अहिले चलिरहेको सबै विवादको अन्तिम निर्णय दिने काम सरकारकै हो ।’ उनले राखेपले एन्फाका कार्यक्रममा असहयोग गरेको अरोप लगाउँदै हङकङविरुद्धको खेल पनि त्यसै कारण स्थगित गर्नु परेको पनि बताए ।

त्यसअगाडि कार्यक्रममा महासचिव किरण राईले एन्फा राखेपको निलम्बनमा परेपछि अब नेपाली फुटबललाई अगाडि बढाउने जिम्मेवारी राखेपकै भएको पनि बताए । उनले भने, ‘अब हामी निलम्बनमा छौं । एसियाकप छनोट तेस्रो चरणअन्तर्गत लाओसविरुद्धको खेलका लागि पुरुष राष्ट्रिय टिम विदेश जानु छ । त्यस्तै फिफा सिरिजका लागि नेपाली महिला टिम पनि विदेश जानु छ, अब त्यसको व्यवस्था पनि राखेपले गर्नु पर्नेछ ।’