काठमाडौँ — अखिल नेपाल फुटबल संघ (एन्फा) लाई राष्ट्रिय खेलकुद परिषद् (राखेप) ले बुधबार निलम्बन गरेको छ ।

निर्वाचन रोक्नका लागि पटकपटक दिइएको निर्देशन पालना नगरेपछि राखेप कार्यकारी बोर्डले खेलकुद विकास नियमावली २०७७ को दफा २९ को (२) लाई टेकेर एन्फा नेतृत्वलाई निलम्बन गर्ने निर्णय गरेको हो ।

यो निर्णयबाट पंकजविक्रम नेम्बाङ एन्फा नेतृत्व ३ महिना निलम्बनमा परेको छ । यही चैत १३ गते एन्फा झापामा अर्ली इलेक्सन गर्ने क्रममा थियो । पछिल्लो समय राखेपले २४ घण्टे स्पष्टीकरण माग गरेको थियो । एन्फाले 'अर्ली इलेक्सन’ आफ्नो अधिकारभित्र पर्ने भन्दै कुनै पनि हालतमा चुनाव नरोकिने भन्दै राखेपलाई जवाफ पठाएको थियो ।