काठमाडौँ — पाटन दरबार संग्राहालयमा पहिलो अन्तर्राष्ट्रिय ताइची दिवस भव्यताका साथ मनाइएको छ । मार्च २१ तारिखका दिन विश्वभर ताइची दिवस मनाउने क्रममा नेपाल ताइचीछ्वान महासंघ, चाइना कल्चर सेन्टर र नेपाल अरनिको समाजले संयुक्त रूपमा कार्यक्रम आयोजनामा गरिएको हो ।

‘फिट फर लाइफ, गो फर ताइची’ भन्ने नाराका साथ मनाइएको दिवसमा नेपालका राष्ट्रिय/अन्तर्राष्ट्रिय खेलाडीहरूले विभिन्न विधाका १ सय भन्दा बढी खेलाडीले ताइची कला प्रदर्शनी गरेका थिए ।

जसमा पाटन संग्राहालय र ललितपुरको तर्फबाट आधारभूत ताइची प्रदर्शनी गरे भने नेपाल ताइची सेन्टरका खेलाडीहरूले बाफाउफु फर्म, ८ फर्म र १३ फर्म प्रस्तुत गरेका थिए । त्यस्तै दक्षिण एसियाली खेलकुद प्रतियोगिताका स्वर्ण विजेता आङबाबु लामा, दोस्रो ताइची अन्तर्राष्ट्रिय प्रतियोगिताका रजत विजेता सुनिज श्रेष्ठ र आमिर लामाको ४२ फर्मको प्रस्तुत गरेका थिए ।

त्यसमा साफका रजत विजेता खेलाडी मचारत्न महर्जनको ताइची सोर्ड प्रदर्शन विशेष देखिएको थियो ।  सोही अवसरमा चाइनिज उसु महासंघका पूर्व उपाध्यक्ष तथा बेइजिङ उसु इन्स्टिच्युटका अध्यक्ष ग्रान्ड मास्टर वु विनले कार्यक्रमको सफलताको भिडियो सन्देश पठाएका थिए । समारोहका प्रमुख अतिथि ललितपुर महानगरपालिकाका मेयर चिरिबाबु महर्जनले नेपालमा ताइची खेलका संस्थापक कर्मा लामालाई सम्मान गरे ।

उसुको प्रदर्शन पछि इनर मंगोलियन आर्टिस्ट ग्रुपले विभिन्न साङ्गीतिक प्रस्तुति दिएका थिए भने ताइचीका खेलाडी रिझा श्री महर्जनले भ्वाइलिन प्रस्तुति पेस गरेकी थिइन् । ८२ वर्षिया खेलाडी अन्नपूर्णा कुँवरको युवा खेलाडीहरूलाई प्रेरित गर्ने मन्तव्यले धेरैको ध्यान तानेको थियो । 

कार्यक्रममा नेपाल अरनिको समाजका अध्यक्ष सुशील प्रजापति, चाइना कल्चर सेन्टरका डेप्युटी डाइरेक्टर लिउ चान फिङले ताइचीको विशेषता बारे जानकारी दिएका थिए । सोही अवसरमा नेपाल ताइचीछ्वान महासंघका अध्यक्ष समेत रहेका प्रशिक्षक मचारत्न महर्जनले नेपालको विभिन्न क्षेत्रमा पुगेर स्वस्थ नागरिक उत्पादन गर्न ताइची खेल विस्तार गर्ने महासंघको योजना रहेको बताए ।

उनको योजनालाई समर्थन गर्दै समारोहका प्रमुख अतिथि ललितपुर महानगरपालिका मेयर चिरिबाबु महर्जनले नागरिकलाई शारीरिक र मानसिक रूपमा स्वस्थ बनाउने ताइची खेललाई विस्तार गर्न महानगरपालिकाबाट सहयोग हुने प्रतिबद्धता जनाएका थिए।  

उनले भने, “ मैले विश्वको धेरै ठाउा घुम्दा ताइची गरेका बालक देखि बद्धसम्मलाई देखो। यस्ता स्वस्थ नागरिक उत्पादन गर्ने खेललाई ललितपुर देखि देशका अन्य स्थानमा पुर्‍याउन महानगर हात बढाउन तयार छ।”