कपिलवस्तु — कपिलवस्तु नगरपालिकाद्वारा आयोजित आठौं राष्ट्रपति रनिङ सिल्ड प्रतियोगिताको पुरस्कार वितरण समारोह बहिष्कार गर्ने दुई विद्यालयमाथि अनुशासनको कारबाही गर्न नगर प्रमुख सुदीप पौडेलले निर्देशन दिएका छन् ।

चैत १ गतेदेखि ४ गतेसम्म सदरमुकाम तौलिहवास्थित बुद्ध पद्म माध्यमिक विद्यालयको खेल मैदानमा सम्पन्न प्रतियोगिताको पुरस्कार वितरण समारोहमा प्रथम र चौथौ भएका कनकमुनि मावि र बुद्धपद्म माविका खेलाडी अनुपस्थित भई बहिष्कार गरेपछि नगर प्रमुखले कारबाही गर्न निर्देशन दिएका हुन् ।

प्रतियोगिताका सबै खेल सम्पन्न भएपछि पुरस्कार वितरणको तयारी भइरहेका बेला बुद्ध पद्म माविका खेल शिक्षक र खेलाडीले कनकमुनि माविका दुई खेलाडी विद्यालयबाहिरका भएको दाबी गर्दै मौखिक उजुरी गरेका थिए । उजुरीपछि विवाद बढ्दै जाँदा दुई घण्टा ढिलो पुरस्कार वितरण समारोह सुरू भएको थियो । विवादले उग्र रूप लिएपछि दुवै विद्यालयले पुरस्कार वितरण समारोह बहिष्कार गरेका थिए । त्यसअघि आयोजक कपिलवस्तु नगरपालिकाले उजुरीको अध्ययन गरी कनकमुनि माविका खेलाडी आधिकारिक रहेको लिखित निर्णय गरेका थिए । 

प्रतियोगितामा कनकमुनि माविले १५ स्वर्ण, ५ रजत र ३ कास्य पदक प्राप्त गरी प्रथम भएको थियो । राष्ट्रिय मावि बिकुलीले ३ स्वर्ण, ४ रजत र १० कास्यसहित दोस्रो स्थान र शीतला बक्स माविले ३ स्वर्णसहित तेस्रो स्थान प्राप्त गरेका थिए । बुद्धपद्म मावि २ स्वर्ण, ११ रजत र ४ कास्यसहित चौथो स्थानमा रहेको थियो ।

पुरस्कार वितरण समारोहमा दोस्रो हुने राष्ट्रिय मावि बिकुलीलाई नगद २० हजार रुपैयाँसहित उपविजेता कप तथा तेस्रो हुने शीतला बक्स माविलाई नगद १५ हजार रुपैयाँसहित कप प्रदान गरिएको थियो । प्रथम र चौथौ हुने कनकमुनी मावि र बुद्धपद्म माविले नगद पुरस्कार, सिल्ड र कप लिएनन् ।