काठमाडौँ — तेस्रो बागमती प्रदेश खेलकुद प्रतियोगिता २०८३ जेठ अन्तिम साता हुने भएको छ । बुधबार काठमाडौंमा बसेको प्रदेश खेलकुद विकास परिषद्, बागमती प्रदेशको २४ औं बोर्ड बैठकले तेस्रो बागमती प्रदेश खेलकुद प्रतियोगिता जेठ २४ देखि ३० सम्म आयोजना गर्ने निर्णय गरेको हो । बैठकले प्रथम बागमती पारा खेलकुद पनि आयोजना गर्ने निर्णय गरेको छ ।

बैठकले बागमती प्रदेशस्तरीय राष्ट्रपति रनिङ सिल्ड २०८३ जेठ १ देखि ३ सम्म गर्ने निर्णय गरेको प्रदेश खेलकुद विकास परिषद् बागमतीका सदस्य–सचिव दीपक लामाले जानकारी दिए । खेलकुद संग्रहालय स्थापना गर्ने निर्णय पनि बैठकले गरेको छ ।

तेस्रो बागमती प्रदेश खेलकुदमा फुटबल, भलिबल, कराते, आईटीएफ तेक्वान्दो, तेक्वान्दो, उसु, जुडो, फुलकन्ट्याक्ट कराते, क्रिकेट, ब्याडमिन्टन, बक्सिङ, एथलेटिक्स, बुद्धिचाल, पौडी र टेबलटेनिस गरी १५ खेलको प्रतिस्पर्धा हुनेछ । प्रतियोगितामा २ हजार ९ सय ५५ खेलाडी प्रतिस्पर्धी हुनेछन् ।