काठमाडौँ — सहिद स्मारक लिग ‘ए’ डिभिजनका क्लब र अखिल नेपाल फुटबल संघ (एन्फा) बीचको वार्ता सोमबार भंग भएपछि नेपालको सर्वोच्च लिग आयोजना अझ अनिश्चित भएको छ । 

एन्फा र नेपाल फुटबल खेलाडी संघबीच अघिल्लो साता चैत ३० देखि ‘ए’ डिभिजन गर्ने सम्झौता भएपछि स्थिति थप नाजुक भएको हो । उक्त सम्झौता गर्ने क्रममा लिगमा सहभागी हुने क्लबहरूलाई नै बेवास्ता गरिएको थियो । 

त्यसकै विरोधमा सोमबार ‘ए’ डिभिजन क्लब सात बुँदे माग राखेर वार्तामा गएको थियो । सातदोबाटोस्थित एन्फा कम्प्लेक्समा भएको वार्तामा एन्फाको तर्फबाट महासचिव किरण राई र सीईओ इन्द्रमान तुलाधर सहभागी भएका थिए । त्यसक्रममा ‘ए’ डिभिजन क्लबका सहभागी हुने १४ मध्ये थ्रीस्टार वा एपीएफ कुन हुने हो, त्यसबारे आधिकारिक निर्णय दिन भनिएको थियो ।

एन्फाले त्यसबारे निर्णय दिन नसक्ने बताएको थियो । लगत्तै एन्फा र ‘ए’ डिभिजन क्लबबीच प्रतियोगिता आयोजना गर्न भएको सम्झौता कार्यान्वयन गर्ने विषयमा पनि ठोस जवाफ आएको थिएन । यस्तोमा ‘ए’ डिभिजन क्लबले थप वार्तामा सहभागी हुन आवश्यक ठानेन । त्यस अगाडि ‘ए’ डिभिजन क्लबले पत्रकार सम्मेलन गर्दै सातबुँदे माग प्रस्तुत गरेको थियो । 

त्यसमा पहिलो माग नै एन्फा र ‘ए’ डिभिजन क्लबबीच प्रतियोगितालाई लिएर ०८२ को कात्तिक १७ गते भएको सम्झौता कार्यान्वयन रहेको थियो । यस्तै दोस्रो माग राष्ट्रिय लिग चालू रहेको स्थितिमा ‘ट्रान्सफर विन्डो’ खुला गर्नुपर्ने थियो । क्लबको तेस्रो माग विदेशी खेलाडीको ‘वर्क परमिट’ का लागि एकद्वार प्रणाली अबिलम्ब गरेर एन्फाले सहजीकरण गर्ने थियो ।